Screât il gnûf Pront Socors pediatric

“Un model di cjapâ tant che esempli ancje par chei altris servizis di salût in F-VJ”

“Un gnûf tassel impuartant pal percors di cjapade in caric di mame e frutin, chel dal gnûf pront socors pediatric dal ospedâl Sante Marie de Misericordie di Udin. Un risultât otignût cu la grande passion e la grande capacitât dai oms e des feminis de Aziende sanitarie universitarie Friûl centrâl, une aziende solide che si insuaze intun sisteme sanitari regjonâl fuart, cun dut che il mont de sanitât in Friûl-Vignesie Julie e tal rest dal Paîs al sedi daûr a passâ un moment dificil”.

Lu à marcât, chest dopomisdì, l’assessôr regjonâl ae Salût, Riccardo Riccardi, intervignût ae presentazion dal gnûf pront socors pediatric dal ospedâl Sante Marie de Misericordie di Udin, un an dopo la scree, tal stes paveon, de cliniche ostetricie gjinecologjiche (che tal 2022 si jere trasferide dal paveon 6).

Un event dulà che a àn partecipât ancje il retôr de Universitât dal Friûl, Roberto Pinton, il sindic di Udin, Alberto Felice De Toni, bonsignôr Guido Genero pe Arcidiocesi di Udin, il prefet di Udin Domenico Lione, il diretôr dal Dipartiment mame frutin, Lorenza Driul, il diretôr de Struture operative complesse (Soc) Cliniche pediatriche, Paola Cogo, il diretôr sanitari Asufc David Turello, il diretôr gjenerâl de Aziende sanitarie universitarie Friûl Centrâl, Denis Caporale, di là di numerôs referents di associazions di volontariât e dal tierç setôr, autoritâts civîls e militârs e il personâl sanitari.

“Cun cheste operazion si garantissin une schirie di servizis impuartants: al è di fat un tassel strategjic no dome te realtât di Udin, ma ancje pal rest dal teritori des ex provinciis di Udin e di Pordenon, che al pront socors pediatric al è une vore leât” al à evidenziât l’esponent dal Esecutîf regjonâl.

Riccardi al à ricuardât che tal 2015, ancjemò prime des legjislaturis Fedriga, la Zonte dal F-VJ di chê volte e veve stabilît di creâ un pront socors pediatric unic pal Udinês e il Pordenonês: “une sielte che, lete cuntune vore di valutazions, in dì di vuê e podarès someâ impopolâr, ma che invezit e pant ducj i siei vantaçs – al à fat notâ -. Une soluzion proponude di altris che o varessin podût contrastâ e che invezit o vin sostignût. Un biel esempli par cui che vuê al pretint soluzions dapardut, dismenteant la necessarie cundizion de sostignibilitât, che cence di jê o riscjaressin dome un acaniment dialetic che nol covente a dinissun, ancjemò mancul pe sigurece des personis”.

“La riorganizazion dal servizi par mame e frutin e à fat deventâ plui sigure la lôr cjapade in caric, no dome tal moment de emergjence urgjence critiche, ma ancje pal rest dal percors, cu la disponibilitât di personâl formât e dedicât. Chest al è un model, che o cjapìn a esempli ancje par chei altris servizis de sanitât de nestre regjon. Al mostre in maniere clare cemût che la centralizazion e la specializazion di un pont di salût a garantissin lis curis miôr pal citadin, lant daûr dai gnûfs modei de societât, cuntune sostignibilitât plene”.

Riccardi al à volût marcâ i numars dai acès tal pront socors pediatric di Udin: tal 2020 a son stâts 9.787, tal 2021 10.495, par cressi ancjemò di plui tal 2022 a 14.201 cuntune medie di acès di 38,9 par dì. Une variazion 3.706 acès in plui in trê agns. In cheste dade di timp a son cressûts i numars di acès pai codiçs plui critics: i fruts in emergjence urgjence sanitarie a àn vût lis curis miôr in graciis de presince di professioniscj formâts par patologjiis specifichis leadis a cheste fasse di etât de popolazion.

Il gnûf pront socors pediatric dal ospedâl Sante Marie de Misericordie di Udin al è tal plan tiere dal paveon 7 “Pedracco”, il stes che al è colegât il repart di degjence, tal prin plan. Cun cheste sudivision dai spazis al devente plui facil jentrâ pai utents e pai mieç di socors (a son ducj i doi sul stes nivel) e ancje davuelzi lis prestazions di emergjence e di urgjence. Cun di plui, i relatîfs percors internis a deventin plui curts, ridusint in cheste maniere i timps dai socors e de assistence.

Il gnûf asset al previôt cuatri ambulatoris par tipologjiis di urgjence diviersis e 8 jets pes osservazions curtis intensivis cun monitoraments centralizâts: doi dai 8 jets a son risiervâts ai pazients che a àn bisugne di misuris di isolament. Cun di plui, a son stadis aumentadis lis dotazions di aparâts eletromedicâi e tecnic implantistics, ancje in graciis des donazions des associazions di volontariât e dal tierç setôr.