Cjarte regjonâl dai servizis

Tabele

La Cjarte Regjonâl dai Servizis e je une card eletroniche cuntun microprocessôr che al permet une interazion gnove e svelte tra il citadin e la aministrazion publiche.
Si fâs presint che la Cjarte e je une Tessare Sanitarie a ducj i efiets, par leç statâl e par volontât regjonâl, e di là dal fat che e sedi stade ativade o no: di fat, o ricuardìn che la ativazion e je impuartante dome pal ûs di servizis on line (par vê plui informazions su chescj servizis, si pues viodi la pagjine dedicade tal sît de Regjon Friûl-Vignesie Julie).
La Cjarte Regjonâl dai Servizis e je ancje:

  • Tessare Sanitarie par ricognossi i assistûts che a acedin aes prestazions dal Servizi Sanitari Nazionâl

  • Tessare Europeane di Assicurazion Malatie

  • La gnove cjarte e à valôr di Codiç Fiscâl

La gnove Cjarte dai Servizis e cjape dal dut il puest de vecje Tessare Europeane che no si produsarà plui.

Si à di ativâ la gnove cjarte par podê doprâ i servizis disponibii in rêt.

ATENZION: Si à di tignî ancje la vecje Tessare Sanitarie fin a gnovis indicazions.
La domande di ativazion e podarà jessi fate tai sportei abilitâts cuntun document di identitât valit e cu la Tessare "Cjarte Regjonâl dai Servizis".

Cui che le pues fâ:

  • l'intestatari de Tessare "Cjarte Regjonâl dai Servizis"

  • pai Minôrs: il gjenitôr

  • pes Personis sometudis a tutele: il tutôr

  • pes Personis domiciliadis tes cjasis di ricovar, o pai degjents di struturis di lungje degjence: il Diretôr Sanitari de struture o un so delegât

  • pes Personis sometudis a un regjim di restrizion de libertât personâl: il Diretôr Carcerari o un so delegât

  • pes Personis ospitadis in struturis residenziâls sociosanitariis (par esempli, comunitâts par tossicodipendents, comunitâts di acet pes fantatis mari, e v.i.): il rapresentant legâl de struture o un so delegât.

Ce che si pues fâ:

inte sezion "Salût" dal portâl dai servizis on line dal Friûl-Vignesie Julie, a son disponibii:

  • cambi dal miedi responsabil

  • paiaments sanitaris

  • archivi paiaments fats on line

  • dâts anagrafics sanitaris
  • miedi responsabil
  • visitis e esams

  • prestazions di impegn professionâl particolâr

  • esenzions
  • prestazions sanitariis
  • vacinis
  • assistence farmaceutiche integrative regjonâl (AFIR)
  • ricovars in ospedâl
  • intervents infermieristics domiciliârs
  • farmacs comprâts
  • ricetis medichis

NB: Si ricuarde che par acedi a ducj i servizis si à di inserî la smart card intal letôr di pueste, si à di vê ativade la Cjarte e instalât i programs che a coventin par fâle funzionâ.

Ce aio di fâ se o ai pierdût, o se mi è stade robade, la Cjarte?

Si pues domandâ il duplicât de Cjarte intun cualsisei ufici de Agjenzie des Jentradis o pûr tai sportei de Aziende Sanitarie di competence che a dan chel servizi, mostrant un document di ricognossiment valit.

Se la Cjarte, pierdude o robade, e jere stade ativade par acedi ai servizis inovatîfs vie Internet, si à di zontâ ae domande di duplicât une copie de denunzie de pierdite o de robarie fate aes autoritâts di Publiche Sigurece, o pûr une declarazion sostitutive di at di notorietât de pierdite o de robarie. Si à di mostrâ la denunzie, o la declarazion sostitutive dal at di notorietât, ancje tal moment de domande di ativazion dal duplicât.

Ce che si à di fâ par ativâ la cjarte

Par ativâ la cjarte bisugne presentâsi li di un sportel abilitât, puartant cun se la Cjarte Regjonâl dai Servizis (CRS) e un document di identitât o di ricognossiment. Si otignarà un codiç personâl, di doprâ par acedi ai servizis in maniere sigure.

Pai fîs minôrs, la domande e à di jessi fate dai gjenitôrs o di cui che al esercite la potestât parentâl.

La domande di ativazion e pues jessi presentade in cualsisei moment dopo che si à ricevude la Cjarte.