Esenzion dal ticket

La esenzion ticket e je une agjevolazion che e da dirit ai citadins disvantazâts dal pont di viste economic a no paiâ i coscj dal ticket sanitari che ogni assistût al à di paiâ par vê prestazions di diagnostiche strumentâl, di laboratori e di medisine specialistiche ambulatoriâl.

La Regjon e à stabilît la proroghe des autocertificazions par status e par redit, validis pe esenzion dai tickets sanitaris, fin ai 31 di Març dal 2021. Il proviodiment si apliche a ducj chei che no àn vût modificazions dal redit.

Nol cambie nuie pes esenzions par patologjie, par invaliditât civîl o dal lavôr. Cun di plui, la prescrizion di farmacs no jentre intal regjim di esenzion, che al tocje invezit i esams clinics e lis visitis medichis.

Dome pes gnovis autocertificazions, che si riferissin ai disocupâts e i lôr familiârs a caric, si domande ai interessâts di lâ daûr des indicazions publicadis sui sîts web des Aziendis sanitariis di riferiment.

La esenzion dal ticket si apliche prin di dut a cuatri tipologjiis di sogjets:

1- Personis sot dai 6 agns o sore dai 65 agns (codiç E01), che a son intune famee cuntun redit complessîf, riferît al an precedent, no plui alt di 36.151,98 euros. Tal câs dai minôrs, al pues sucedi che il frut al vedi dirit ae esenzion, al contrari dai siei gjenitôrs o di chei altris fradis cun plui di sîs agns. In chescj câs, il modul al varà di jessi firmât dal gjenitôr o di cui che al esercite la potestât gjenitoriâl.

2- Disocupâts e lôr familiârs a caric (codiç E02) che a son intune famee cuntun redit complessîf, riferît al an precedent, plui bas di 8.263,31 euros, incressût fin a 11.362,05 euros se al è un coniugât e di altris 516,46 euros par ogni fi a caric.

3- Titulârs di assegn (ex pension) sociâl e lôr familiârs a caric (codiç E03).

4- Titulârs di pensions al minim cun plui di 60 agns e lôr familiârs a caric (codiç E04), che a son intune famee cuntun redit complessîf, riferît al an precedent, plui bas di 8.263,31 euros, incressût fin a 11.362,05 euros se al è un coniugât e di altris 516,46 euros par ogni fi a caric.

Lis feminis di cjase e i students a gjoldin de esenzion ae partecipazion ae spese sanitarie dome se a son intun dai cuatri câs previodûts pe esenzion. Par podê beneficiâ de esenzion dal ticket par motîfs di status e di redit, il miedi che al fâs la prescrizion (miedi di medisine gjenerâl, pediatri di libare sielte e specialist) al certifiche il codiç di esenzion tal moment de compilazion de ricete.