Pront Socors

Ducj i citadins cun problemis di salût che a àn bisugne di trataments urgjents.

Par sigurâ ai utents un ordin di acès che al permeti la prioritât a cui che al è in cundizions plui gravis, il servizi al è organizât in maniere di visitâ par primis lis personis cun problemis plui grâfs e urgjents.

Si pues acedi al pront socors in dôs manieris diferentis:

• cui mieçs e cul personâl di socors, che al acompagne daurman il pazient inte aree sanitarie;
• cui mieçs propris, passant pe aree dal acet dulà che un infermîr al fâs la prime valutazion dai sintoms.

Cemût che al funzione il pront socors

L’acet dai utents si clame “triage”: al è un metodi internazionâl fat di une serie di domandis par classificâ lis prioritâts des personis che a son in spiete, daûr de gravitât dai sintoms che a àn.

Al utent i ven dât un codiç di colôr, che al covente al personâl par viodi subit cui che al à plui bisugne di assistence e cui che invezit al pues spietâ parcè che al à un probleme di salût cuntun nivel di pericul plui bas.

Codiç ros

Al identifiche cui che al è in grâf pericul di vite e che al à di jessi visitât daurman. Il pazient cun chest codiç al à la precedence su ducj chei altris.

Codiç zâl

Al identifiche cui che al à di jessi visitât par sintoms che a podaressin lâ svelts in piês e comprometi lis cundizions clinichis; in chest câs il timp di spiete al è minim (dentri di 15 minûts).

Codiç vert

Al identifiche cui che nol à sintoms grâfs e che al pues jessi valutât dopo dal tratament dai câs plui urgjents; par chest codiç la spiete e je di 30 minûts, ma e je condizionade dal numar di câs urgjents che in chel moment il personâl sanitari al à di stâur daûr.

Codiç blanc

Al identifiche cui che al domande il servizi par problemis che no compuartin in nissune maniere un pericul di vite; in chest câs il timp di spiete nol compromet lis cundizions clinichis dal utent. Par solit, il timp di spiete al è lunc, ancje cualchi ore, pal fat che a àn la prioritât chês altris categoriis di utents. Chestis prestazions a puedin domandâ il paiament dal ticket.

L’infermîr de acetazion al cjape sù i dâts, al atribuìs un dai codiçs colôr elencâts sore, e al consegne une card informative dulà che al è ripuartât il codiç assegnât e la ore di inseriment te liste di spiete.

Tal câs che si presentin utents forescj che a san fevelâ dome la lôr lenghe, il personâl al ative il supuart dal servizi di mediazion linguistiche culturâl che la Aziende e met a disposizion par une vore di lenghis.