Screening mamografic: publicât il calendari dal secont semestri 2025
vinars 11 di Lui dal 2025
Cui 5 di Avost al sarà atîf ta dut il teritori de ASU FC
Tal 2025 il program di screening mamografic de Aziende Sanitarie Universitarie dal Friûl Centrâl al finìs 20 agns. Un travuart impuartant che o festezìn seguitant a tignî cont de salût des feminis.
Al è disponibil il calendari pal secont semestri dal 2025: la Unitât Mobile e sarà presinte in cutuardis sedis dal teritori par ufrî un servizi comut e dongje cjase.
A son stâts programâts plui di 28.000 apontaments, di Avost a Setembar, par un totâl di cuasi 50.000 esams di screening mamografic ufierts inte anade.
Cemût partecipâ
L'esam al è sore nuie e al è ufiert, come che a disin lis Liniis Vuide, aes feminis fra i 45 e i 69 agns (e fin a 74 agns se a àn za partecipât in passât).
Par fâ la mamografie al baste presentâsi cu la letare di invît rivade a cjase.
Par informazions o par tornâ a programâ un apontament: · Direzion di pueste eletroniche: screening@asufc.sanita.fvg.it
- Telefon: 0432553290 di lunis a vinars des 9.00 aes 13.00
Calendari
La Unitât Mobile si fermarà tes sedis previodudis dal calendari e e tornarà in mût periodic. Se la date proponude no va ben, si pues tornâ a programâ l'apontament, ancje intune altre sede plui comude.
| Udin | li dal IMFR Gervasutta, vie Gervasutta, 48 | dai 05/08/2025 ai 19/09/2025 dai 06/10/2025 ai 30/12/2025 |
| Çarvignan | li dal Centri Civic, frazion Muscli, vie dei Platani, dongje dal cjamp sportîf | dai 06/08/2025 ai 03/09/2025 |
| Dimpeç | li dal Poliambulatori, plaçâl ai Caduti, 17 | dai 03/09/2025 ai 08/09/2025 |
| San Denêl | li dal Ospedâl di San Denêl, vie Trento Trieste, 10 | dai 04/09/2025 ai 09/10/2025 |
| Davâr | li dal Poliambulatori, vie Ex Ferrovia, 1 | dai 09/09/2025 ai 16/09/2025 |
| Paluce | li dal Poliambulatori, place XXI-XXII Luglio, 7 | dai 17/09/2025 ai 22/09/2025 |
| San Zorç di Noiâr | li dal Distret de "Riviera Bassa Friulana", Vie Palmanova 1 | dai 22/09/2025 ai 04/10/2025 |
| Tisane | li de Ex-Stazion Ipiche, vie Beorchia 19 | dai 10/10/2025 ai 06/11/2025 |
| Glemone | li dal Presidi Teritoriâl, place Rodolone, 2 | dai 23/10/2025 ai 11/11/2025 |
| Codroip | li dal Distret dal Friûl di Mieç, viâl Veneto 33, Condominio Commerciale 2 | dai 07/11/2025 ai 25/11/2025 |
| Tumieç | li dal Ospedâl, vie Morgagni, 18 | dai 12/11/2025 ai 27/11/2025 |
| Tresesin | li dal Centri Teritoriâl, Vie Carpini, 3 | dai 26/11/2025 ai 23/12/2025 |
| Cividât | li dal Distret dal Nadison, Vie Carraria, 29 | dai 28/11/2025 ai 16/12/2025 |
| Palme | li dal Dipartiment di Prevenzion, vie Molin, 21 | dai 17/12/2025 ai 30/12/2025 |
Un percors sigûr e di cualitât
Il dot. Francesco Gongolo, responsabil de Struture Screening e malatiis cronichis degjenerativis te ASUFC: "Il program al à dimostrade la sô validitât: in 20 agns, la mortalitât par tumôr dal sen tes feminis dal Friûl - Vignesie Julie si è ridote dal 24% (rapuart Istisan 24/09). Ogni mamografie e ven lete di dôs des siet senolighis dedicadis de ASU FC, specialistis che a àn superât une preparazion rigorose e une vore seletive".
La Aziende sanitarie e ufrìs un percors complet: in ducj i câs necessaris, a son previodûts esams di aprofondiment tai ospedâi di Tisane, Palme, San Denêl, Tumieç e Udin, cuntun percors vuidât e
personalizât. Dutis lis sedis a fasin part de Breast Unit ASUFC, increditade di EUSOMA, il plui alt standard european di certificazion des curis dal tumôr dal sen.
I limits dal screening mamografic: ce che al è impuartant di savê
"La mamografie e je un esam une vore valevul, ma no je infalibile - al va indevant il dot. Gongolo - e in câs rârs un tumôr al pues disvilupâsi fra un control e chel altri. Par chest al è fondamentâl che ogni femine e stedi atente di eventuâi cambiaments dal sen (come nodui, pierditis di licuit o sanc dal cjavidiel, retrazion dal cjavidiel, sglonfums sot de lesine) e, in presince di sintoms, e contati daurman il so miedi o la Centrâl Operative screening (screening@asufc.sanita.fvg.it – 0432 553290, dal lunis al vinars des 9:00 aes 13:00), cence spietâ il prossim invît.