Domenie ai 6 e lunis ai 7 di Avrîl a son lis Zornadis di Prevenzion de Sindrome dal Frut Scjassât (Shaken Baby Syndrome)

La Pediatrie di Tisane e aderìs ae iniziative promovude de societât sientifiche Pediatriche SIMEUP e di Terre des hommes.

La Pediatrie dal Ospedâl di Tisane e cjape part ae impuartante iniziative nazionâl di sensibilizazion che e scomence sabide ai 5 di Avrîl cuntun pont informatîf li de jentrade dal Ospedâl di Tisane des 10.00 aes 13.00 e e va indenant par dute la setemane tal repart di Pediatrie, dulà che i specialiscj a saran a disposizion di gjenitôrs, nonos, insegnants e di ducj chei che a son a contat cun neonâts e fruts piçui par spiegâ i pericui di cheste forme di traume cerebrâl grâf che e pues sucedi dopo di vê scjassât un neonât o un frut piçul in maniere violente.

L’obietîf de iniziative al è chel di sensibilizâ sul teme de prevenzion, mostrant lis modalitâts justis par protezi i fruts di chest pericul, cu la convinzion che dispès no si cognossin lis pussibilis gravis consecuencis dal scjassâ il frut, ancje se par pôcs seconts.

Spes al è un vaî continui dal frut piçul (0-2 agns) che al scjadene une pierdite di control momentanie in cui che al viôt di lui e che lu puarte a scjassâlu in maniere violente par fâlu smeti, cence nissune volontât o cussience di fâi un dam.

Cul jutori di libruts informatîfs, a vignaran dadis prin di dut informazions su lis carateristichis dal vaî tai prins mês di vite, che al à une ponte fisiologjiche des 2 setemanis di vite fin ai prins 4/5 mês: in chest interval di timp a puedin verificâsi crisis di vaiudis inconsolabilis che cualchi volte a puedin lâ indenant ancje oris, spes sot sere.

Chestis crisis a rapresentin une fase evolutive normâl e a calin in maniere naturâl tal timp, par po regredî tai mês dopo.

Dut câs, cheste situazion e pues provocâ tai gjenitôrs, o in gjenerâi in cui che i sta daûr al frut, preocupazion, frustrazion, strachece e ogni tant ancje rabie, elements che a puedin inviâ, ancje cenece volê, une reazion che e puarte a scjassâ il frut.

Cul jutori di un manichin, al vignarà spiegât ai gjenitôrs parcè che al è cussì pericolôs scjassâ il neonât; cheste azion, ancje se fate par pôcs seconts, e pues causâ lesions cerebrâls ancje une vore seriis o permanentis, parcè che il cjâf al è plui pesant e in proporzion plui grant a pet dal rest dal cuarp, i muscui dal cuel a son ancjemò debii e il cerviel, stant che al è in vie di svilup, al è une vore delicât.

Lis consecuencis pussibilis a son di un dam cerebrâl fin al come e 1 câs su 4 al puarte ae muart.

Al è impuartant promovi il messaç che un frut nol va mai scjassât a dinissune etât, ma al è fondamentâl ancje l’aspiet de prevenzion: se ti pâr che tu stâs par pierdi il control, la prime robe che tu âs di fâ al è meti il frut “al sigûr”, par esempli te scune, e slontanâti par gjestî il moment e domandâ jutori.

La Diretore de Pediatrie di Tisane, dot.e Elisabetta Miorin: “E je une forme particolâr di abûs infantîl pôc cognossude e cun cheste campagne o volìn sensibilizâ ae prevenzion ducj chei che ogni dì a passin un pôc di timp cui fruts: al è impuartant savênt di plui e soredut jessi bogns di controlâ i moments che a puedin sei pardabon pericolôs. Si augurìn che e sedi une buine partecipazion e cun dute la equipe o sarìn a disposizion di ducj chei che a àn plasê di lâ insot di cheste tematiche”.