Sport, cûr e teritori: Tara Dragas e il Lions Club a puartin un pocje di ligrie te Pediatrie di Udin
La atlete des Flamis Aur, acompagnade dal Lions Club Vençon Vie Julia Augusta, e à fat visite ai piçui pazients regalant i pipins des sôs garis
Chê vivude vuê te Cliniche Pediatriche dal Ospedâl Sante Marie de Misericordie di Udin e je stade une matine ae insegne des emozions e de solidarietât. Protagoniste dal event e je stade Tara Dragas, zovin talent de gjinastiche ritmiche e puartecolôrs dal Grup Sportîf des Flamis Aur, che e je stade a cjatâ i fruts ricoverâts e e à vût un pinsîr di grant afiet.
La iniziative e je stade une vore volude de Associazion "Noi e domani" e promovude dal Lions Club Vençon Vie Julia Augusta, di simpri atent a proviodi aes necessitâts dal teritori e a sostignî lis fassis plui fragjilis. A rapresentâ il club al jere presint il President Salvatore Bellanti, insiemi cun cualchi volontarie, che al à cetant volût chest incuintri par meti adun i valôrs positîfs dal sport e la vicinance cun cui che al sta frontant un moment di dificoltât.
La atlete furlane no je rivade cu lis mans scjassant: e à puartât cun se desenis di pipins, cjapâts sù in ocasion des sôs numerosis competizions nazionâls e internazionâls. Di fats, e je tradizion che il public de ritmiche al tiri regâi in pedane ae fin des esibizions; Tara e à decidût di cjatâ une cjase gnove a chescj tenars compagns di viaç, regalantju ai piçui pazients par ufrîur un moment di lizerece.
Il Lions Club Vençon Vie Julia Augusta al à curât cun atenzion dute la part aministrative de iniziative, in plui che la sanificazion, la preparazion e la imbaladure dai pipins, garantint di stâ daûr di ogni particolâr cun responsabilitât e rispiet pal contest dal ospedâl.
Dilunc de visite, Tara Dragas e je restade a fevelâ cul personâl e, cul supuart des dotoris Toniutti e Ninin, e à condividût un messaç su la impuartance dal sport tant che scuele di vite.
La iniziative e à ricevût l'agrât dal personâl medic e sanitari dal repart: la visite e je finide cu lis fotografiis daûr de tradizion e cun tantis musis ridintis, intune zornade dulà che sport e associazionisim a àn fat scuadre pal ben dai plui piçui.
La azion de campione e rapresente cetant di plui di une semplice donazion: al è un messaç di vicinance, resilience e sperance. Ogni pipin al conte un viaç, une sfide, un risultât otignût cun dissipline e passion. Consegnâju ai fruts nol vûl dî dome condividi un ogjet, ma une storie di impegn e di siums che a deventin realtât.
Un ringraciament speciâl al va aes volontariis dal Lions Elisa e Silvia, che cun dedizion e spirt di servizi a àn dât un contribût fondamentâl par meti adun il progjet. Il lôr impegn al è une testemoneance di cemût che il lionisim al sa meti adun gjenerazions diviersis cuntun sôl obietîf: servî la comunitât cun concretece e cûr.
Chest moment al vûl jessi un segn di cure morâl e di ispirazion pai plui zovins: parcè che ancje tai moments dificii si puedin cjatâ esemplis positîfs, modei di determinazion e azions solidariis autentichis. Il servizi non è dome fâ. Al è jessi presints.
ASUFC e ringracie Tara Dragas e il Lions Club Vençon Vie Julia Augusta par cheste azion maraveose e par vê regalât ai piçui pazients un moment di serenitât.