Un incuintri par cognossi la mont e frecuentâle in sigurece

Il Servizi Sociâl de Cjargne e il Comun di Tumieç a promovin un incuintri public programât par lunis ai 16 di Fevrâr des 15.00 aes 17.00 tal centri di agregazion "Podìn insieme" di vie Oberdan a Tumieç, che al sarà animât dai volontaris dal Socors Alpin cjargnel.

L'incuintri al varà i obietîfs di promovi la cognossince des ativitâts che il Socors Alpin al davuelç, di sensibilizâ su la tematiche de sigurece tal ambient des monts, e di dâ indicazions pratichis sui compuartaments corets di vê cuant che si va in mont, par prevignî situazions di pericul.

"Il moviment, lis cjaminadis, lis ativitâts che si fasin tal viert in gjenerâl - al interven l'assessôr Marioantonio Zamolo - a son elements che a promovin il benstâ psicofisic, ma l'ambient esterni, e in particolâr chel de mont, al va svicinât in maniere responsabile. E tra lis informazions utilis al è impuartant cognossi la rêt che e pues ufrî un supuart e judâ in câs di criticitâts. Cognossi la rêt di supuart e cjapâ lis precauzions justis al pues fâ in mût che une esperience positive di benstâ no si trasformi intune emergjence".

Vie pal incuintri si frontaran in particolâr chestis tematichis: il rûl e lis funzions dal Socors Alpin, la sensibilizazion e la planificazion di une escursion in sigurece, il furniment adat, la gjestion des emergjencis e lis modalitâts coretis par domandâ socors, in plui che trasmeti lis buinis pratichis par svicinâsi al ambient de mont in maniere cussiente e rispietose.