Donazion pe Pediatrie di Tumieç

Joibe ai 12 di Jugn, te Pediatrie dal Ospedâl di Tumieç, si è tignude une piçule cerimonie pe donazion di cinc cussins pal latament e doi dispositîfs par disconzelâ e scjaldâ il lat de bande de Casa degli Orsetti di Sudri, nassude de iniziative di Martina e Giampiero, che a àn volût dâ une gnove vite ai troncs butâts jù de burascje Vaia.

Si trate di une schirie di ogjets e dispositîfs par favorî il latament de mari, che si cumbinin ad implen cul obietîf dai reparts di Pediatrie e di Ostetricie-Gjinecologjie di promovi e sostignî i gjenitôrs e la salût dai frutins tes primis 1000 zornadis di vite, che a son une vore impuartantis.

A jerin presints ae cerimonie la dot.e Ingrid Toller, Diretore de Pediatrie, la coordenadore infermieristiche dot.e Antonella Gerion, il Diretôr de Gjinecologjie-Ostetricie dot. Giuseppe Graziano e la dot.e Maria Zigotti Fuso, che a àn ringraciât Martina e Giampiero pal lôr at e a àn ilustrât lis particolaritâts dal pont nassite di Tumieç.

Ancje se e à numars piçui, la Struture e smire a meti in vore azions orientadis ae Family Centered Care (Assistence incentrade su la famee) un model che al met la famee tal centri de cure, ufrint une assistence personalizade e che e favorìs la partecipazion ative dai gjenitôrs tal percors de nassite e te cure dal neonât: cheste metodiche e promôf une esperience positive e relazionâl par dutis lis personis cjapadis dentri, creant un ambient sigûr e di supuart.

In plui e rinfuarce il pinsîr di jessi pont di riferiment pe Comunitât de Cjargne pai bisugns di gjenitôrs e fruts: cheste donazion e je la prove concrete di trop che la int dal teritori e je ative tal puartâ indenant cheste idee.