Gnûf sportel informatîf tal Ospedâl di Palme graciis ae Associazion IDEA ODV
A servizi des fameis par informazions e imprescj concrets pe assistence
Cul obietîf di rinfuarçâ la sinergjie tra lis istituzions publichis e il Tierç Setôr, al nas un gnûf sportel informatîf tal Ospedâl di Palme (Jalmic), che al smire a ufrî aes fameis informazions e imprescj concrets pe assistence.
La consulence tra personis a pâr e je un dai pilastris di IDEA ODV, la Associazion che e à la sô sede principâl propit a Palme. La filosofie si fonde suntun principi fondamentâl: la persone cun disabilitât e à di podê determinâ la proprie vite in autonomie, potenziant lis sôs risorsis par costruî un progjet di vite indipendente e orientât ae paritât.
Tal sportel, i socis volontaris di IDEA ODV a metaran a disposizion la lôr esperience par scoltâ lis domandis dai utents, judâju a orientâsi tal ospedâl de Basse Furlane e a cjatâ rispuestis aes lôr dibisugnis.
Oraris e servizis dal sportel: ogni martars e joibe di matine, des 7:30 aes 12:30, tal plan tiere dal Ospedâl di Palme, li dal ingrès Velari.
Chest gnûf pont di scolte e orientament al va a slargjâ la presince di IDEA ODV sul teritori regjonâl. Il sportel di Palme di fats si zonte ae rêt di sportei za atîfs a Çarvignan, Cormons, Porpêt, Gonârs, Felet, Sacîl, Pordenon e al CRID (Centri di Riferiment Informatîf su la Disabilitât) di Tisane.
La Associazion e je ative sul teritori dal Friûl-Vignesie Julie par promovi la inclusion sociâl, i dirits des personis cun disabilitât e il concet di vite indipendente, ufrint supuart diret, orientament e consulence a pâr a citadins e fameis.