Salût e sigurece sul lavôr: spot metûts adun dai students dal teritori in colaborazion cun ASUFC

Inte suaze dal progjet "Promozion de Culture de Sigurece sul Lavôr e a Scuele" promovût di ASU Friûl Centrâl cun altris partner istituzionâi, i students di cierts istitûts scolastics dal teritori a àn metût adun doi spot che a tratin il teme de salût e de sigurece sul lavôr, lavorant su la consulence sientifiche dai operadôrs de SOC PSAL dal Dipartiment di Prevenzion di ASU FC e i regjiscj Anna Sandrin e Ado Hasanović  coordenâts dal Centri pes Arts Visivis - Mediateche Mario Quargnolo di Udin, e la colaborazion di INAIL e dal Comant dai Vigjii dal Fûc di Udin.

Meti adun chescj spot e je une ocasion pai students par rifleti sui temis fondamentâi di prevenzion pal lôr futûr di lavoradôrs, ma ancje pe lôr vite di ogni dì, stant che cetancj pericui a son trasversâi e che svicinâsi ae tematiche de sigurece proponude culì al pues jessi util sedi a cjase, che a vore o pe strade.
 
"Ce che tu ti fumis: spot sul fum dal sigaret eletronic" al è stât metût adun dai students de tierce A Grafiche e Comunicazion dal ISIS R. D'Aronco di Glemone, e al mostre ce che al conten pardabon il sigaret eletronic.  

"Fâs la robe juste: spot su la emergjence antiincendi", invezit, al è stât metût adun dai students de 4A ITE - setôr economic dal ISIS. P. di Aquilee di Cividât cu la colaborazion e la partecipazion dal Comant dai Vigjii dal Fûc di Udin e al conte ce che al sucêt intune matine di lezion come tantis altris a scuele, cuant che a colp al sune l'alarme di emergjence.
 
Par pandi chest messaç di prevenzion a ducj i citadins, tal mês di Avost i spot a saran proietâts prime dai films in programazion serâl tal Zardin Loris Fortuna di Udin, che al da acet ae rassegne cinematografiche estive dal Centro Espressioni Cinematografiche.