Udin: la sale di spiete de aree diagnostiche e à une lûs gnove

Lunis ai 17 di Jugn, te aree diagnostiche dal paveon 15 dal Ospedâl di Udin, cuntune piçule cerimonie si è screade la esposizion permanente des oparis fatis dai utents dal Centri pal tratament dai disturps dal compuartament alimentâr (CUDICA) de Cliniche psichiatriche: la sale di spiete e je cumò decorade cui lavôrs, che a judin a dâ un pôc di confuart prime des prestazions.
Ae cerimonie a jerin presints il Diretôr Miedi dal Sante Marie de Misericordie, dotôr Montemurro, il professôr Balestrieri de Cliniche Psichiatriche e il personâl de Radiologjie che a àn ringraciât i utents e i rapresentants de dite.
Lis oparis a son stadis fatis dai utents dal Centri Diurni dal CUDICA e graciis ae donazion gjenerose de dite Ivicolors che e à furnît lis telis e i materiâi che a coventavin pal Servizi “Scuola in Ospedale” di Udin, che al fâs part dal Istitût Comprensîf di Udin VI dal Liceu Artistic “Sello”.

A son stadis fondamentâls la presince dal docent di dissiplinis pitorichis e grafichis Massimiliano Busan e la poie e la presince de associazion “FENICE ODV” che e da simpri il so supuart ai utents e al Servizi.

Il teme des oparis al jere “la lûs”, che i utents a àn savût interpretâ in plui manieris, sedi come simbul di vite e di rinassite che come event fisic di radiazion luminose simile aes radiazions dopradis in Radiologjie.

Il dotôr Montemurro al à dit: “O ringraciìn dutis lis personis che a àn permetût di realizâ chest progjet cetant biel e cheste cerimonie simboliche: al è une testemoneance dal procès di umanizazion des curis che o cirìn di svilupâ tes nestris struturis”.