Il Dipartiment di Chirurgjie di ASUFC al è protagonist dal 35m congrès sul aparât digjerent
martars 24 di Dicembar dal 2024
La chirurgjie robotiche e je simpri plui impuartante: i intervents fats cun cheste tecnologjie a son plui che dopleâts.
Lis struturis dal Dipartiment di Chirurgjie di ASUFC a àn a pene concludût doi dîs di full immersion al "Congresso Palazzini", un event innomenât a nivel internazionâl sul teme de chirurgjie miniinvasive.
La edizion 2024 e je stade une ocasion straordenarie par cognossi miôr lis tecnichis e lis novitâts plui resintis te chirurgjie digjestive, sedi tradizionâl che laparoscopiche, cun passe 150 intervents fats in direte dai chirurcs plui famôs a nivel internazionâl.
La edizion online e à permetût di superâ i limits de logjistiche: plui di 500 oris di trasmission su dutis lis patologjiis dal aparât digjerent, adun cun temis di endocrinologjie, gjinecologjie, ortopedie e urologjie; in cheste maniere il congrès al è stât visibil a nivel nazionâl e internazionâl cuntune partecipazion inclusive che e à zovât a ducj.
Par ASUFC a son stadis fatis e mostradis a dut il mont ben 6 operazions di alte chirurgjie in 5 specialitâts diferentis (2 nefrectomiis laparoscopichis, 1 emicolectomie dx robotiche, 1 resezion anteriôr di sigma-retrobotiche, 1 lobectomie polmonâr toracoscopiche, 1 isteroannessiectomie bilaterâl robotiche): si è alternât l'ûs di dôs salis operatoriis, prime une e dopo chê altre, cuntune coordinazion perfete, metint in evidence l'ûs de robotiche che tai ospedâi e je in evoluzion continue.
A pet des edizions precedentis, là che ASUFC e à simpri partecipât, cheste volte si à volût dâ plui spazi ae chirurgjie robotiche parcè che, ancje te pratiche cliniche di ogni dì, e je une tecniche doprade simpri plui. Se fin a cualchi an indaûr e jere une ativitât esclusive dai esperts urolics, vuê la chirurgjie robotiche e je une tecniche doprade une vore de chirurgjie gjenerâl, ma ancje di chê toraciche e gjinecologjiche: in chest câs l'interès al è daûr a cressi, massime chel pe gjestion des patologjiis plui complessis; di fat la chirurgjie robotiche e permet di intervignî in maniere pôc invasive e cun grande precision dulà che fin a pôc timp indaûr si veve di fâ tais adominâi o toracics e chest al permet di vuarî prime e miôr dopo de operazion.
Podê doprâ la tecnologjie robotiche in maniere condividude di plui specializazions e à puartât ASUFC a operâ plui pazients: tal 2023 i câs tratâts cui robots a son stâts 194; tal 2024 a son stâts 410.
Par chest ASUFC e previôt tal so plan di investiment 2024/25 di comprâ ancje un secont robot.
Il Diretôr de Cliniche di Chirurgjie, Giovanni Terrosu: "O ringraciìn ducj chei che ancjemò une volte a àn permetût ae Chirurgjie di mostrâ ce che e je buine di fâ, valorizant lis capacitâts tecnichis e organizativis dai nestris professioniscj".
Il Diretôr sanitari di ASUFC, David Turello: "Une visibilitât di chest nivel pes nestris chirurgjiis e je un motîf di braùre sot plui aspiets: la colaborazion e lis capacitâts professionâls dimostradis a son stadis ecelentis e lis atestazions di ricognossiment che o vin vudis a son la prove di un lavôr ecelent".