Laboratori «Tuttintondo» a Glemone
Laboratori "Tuttintondo" par frutins dai 12 ai 36 mês e pai lôr gjenitôrs (o par cui che ju compagne)
Il percors, dedicât a frutins dai 12 ai 36 mês e ai lôr gjenitôrs (o a cui che ju compagne), al à l'obietîf di stimolâ i piçui a jessi autonoms e a esplorâ l'ambient, favorî la lôr creativitât, promovi la relazion tra frut e adult e lis primis interazions tra i fruts midiant di zûcs, ativitâts di manipolazion, stravâs, dissen, costruzions, cjants, nainis, rimis e leturis. Un altri obietîf al è chel di promovi il dialic e il confront tra adults sui temis psicoeducatîfs.
I incuintris par fruts e gjenitôrs si fasaran te Palestre de Scuele Primarie di Plovie, metude a disposizion cun cortesie de Aministrazion Comunâl di Glemone, joibe ai 20 e ai 27 di Novembar e joibe ai 4 e ai 11 di Dicembar, cun ingrès e bon acet des 16.45 aes 17.00, ativitâts cun fruts e adults des 17.00 aes 18.30 e jessude des 18.30 aes 18.45.
Joibe ai 18 di Dicembar, des 17.00 aes 18.00 te Sale riunions dal Servizi Sociâl dai Comuns, al sarà un incuintri dome pai gjenitôrs cul titul Il gjenitôr tant che "fonde sigure". L'apontament al sarà vuidât di Amanda Dreossi, psicolighe psicoterapeute de Cooperative Aracon.
I incuintris par fruts e gjenitôrs a podaran jessi inviâts une volte rivâts al numar minim di cinc cubiis/fameis. Al sarà pussibil dâi acet a undis cubiis/fameis al massim. Nol sarà pussibil acetâ plui di undis cubiis/fameis. Lis ativitâts a son sore nuie. Ducj i partecipants a saran sigurâts. Si varà di fâ une preiscrizion inviant un messaç o telefonant al numar 340 1746328 dentri di vinars ai 14 di Novembar. Ae prime assence no justificade il puest al sarà assegnât ai iscrits in spiete.