Stress di calôr sul lavôr: un probleme simpri plui rilevant

Tal mês di Otubar i operadôrs dal Dipartiment di Prevenzion di ASUFC a àn presentât a Cividât, te cunvigne nazionâl su la sigurece e la salût in agriculture, un studi fat l'Istât passât su la esposizion al calôr dai lavoradôrs dal setôr agricul. 

L'impat dal mudament climatic in F-VJ

Il mudament climatic e la consecuence dal incressi des temperaduris a àn un impat su la salût e su la sigurece dal lavôr ancje te nestre regjon. Un rapuart resint de Agjenzie Regjonâl pe Protezion dal Ambient al conferme cheste "evoluzion climatiche": il 2023 al è stât il tierç an plui cjalt che si sedi mai regjistrât in Friûl-Vignesie Julie. Ancje lis proiezions pal avignî a mostrin un gnûf riscjaldament che, se no calin lis emissions di gas sere, al rapresentarà un altri fatôr di pericul pe salût e pe sigurece dai lavoradôrs, massime par chei che a son a vore tal viert tai mês plui cjalts dal an (agricultôrs, operaris assegnâts ae manutenzion dal vert, edîi, e v.i.). 

Di là des patologjiis plui cognossudis leadis al cjalt tant che i agagns, la sincope causade dal calôr o i colps di calôr, che a puedin ancje jessi fatâi, studis resints a àn metût in evidence un colegament impuartant tra lis temperaduris altis e l'incressi dai infortunis sul lavôr. La esposizion al calôr tal puest di vore e puarte ancje a une diminuzion de produtivitât: di fat, si calcole che intai paîs de Europe meridionâl tal 2030 lis oris pierdudis par vie dal aument de temperadure a saran il dopli di chês dal 1995.

Cun chestis premessis, ducj i sogjets cjapâts dentri (lavoradôrs, datôrs di lavôr, associazions di categorie, operadôrs de prevenzion, istituzions) a àn l'oblic di frontâ il teme dal pericul causât dal stress termic, cun chê di cjatâ strategjiis par gjestîlu in maniere juste e eficace.

Il studi

Par studiâ chest probleme e definî azions di prevenzion, tai mês di Lui e di Avost il personâl de Struture Operative di Prevenzion e Sigurece tai Ambients di Lavôr, che al fâs part dal Dipartiment di Prevenzion de Aziende Sanitarie Universitarie Friûl Centrâl (tecnics de prevenzion, miedis dal lavôr e assistents sanitaris) al à puartât indenant une campagne di misurazions sul teren par valutâ il pericul di stress termic derivât dal calôr. Si trate di un aspiet che al tocje cui che al lavore tal viert: a son stâts duncje dâts fûr cuistionaris par verificâ la percezion dal pericul de bande dai lavoradôrs e valutâ lis misuris di prevenzion aziendâls e individuâls metudis in vore cuant che a son temperaduris altis. 

Marco Fabozzi, tecnic de Prevenzion e incargât di funzion de Aree Sigurece e Igjiene dal Lavôr di ASUFC e coordenadôr dal studi, al precise che la indagjin e cjapave dentri i lavoradôrs agricui dal Friûl di Mieç impegnâts te coltivazion di ortaiis e plantis ornamentâls (tai cjamps e dentri des seris) e tal tai des areis verdis.

I lavoradôrs che a àn fat il scandai a son stâts cirche cuarante. A àn rispuindût a domandis su la lôr ativitât e a àn podût ancje provâ cualchi indument refrigjerant.

I risultâts

I dâts cjapâts sù des centralinis microclimatichis e elaborâts daûr dal indicadôr WBGT (wet bulb globo temperature, o globotermometri a cjâf umit), che al cumbine la temperadure cu la umiditât e la velocitât dal aiar, à an evidenziât che te plui part dai câs lis misuris a passavin i valôrs limit di riferiment, pandint une situazion di pericul pe salût dai lavoradôrs. Dai scandais al è vignût fûr che il titulâr dispès nol met a disposizion aghe e che cirche il 30% dai intervistâts le bevin a temperadure naturâl; doi tierçs di lôr, vie pal turni di lavôr, a consumin une cuantitât di aghe dal dut insuficiente a pet de ativitât e des temperaduris cjaldis. 

Ancje il numar di polsis che a fasin i lavoradôrs a son pocjis, cun di plui in zonis cence ombrene. No son miôr i dâts su la formazion leade al pericul dal "stress termic": passe il 60% dai intervistâts nol sa cuâi che a son i segnâi dal colp di calôr ni ce fâ tal câs che si vedi di socori cualchidun.

Carlo Bacchetti, tecnic de prevenzion e coordenadôr dal Grup regjonâl salût e sigurece in agriculture, al aferme che une altre criticitât vignude fûr e je chê de pocje atenzion pe protezion cuintri des radiazions solârs, che a puedin puartâ a tumôrs e al invecjament de piel: il 57% dai lavoradôrs analizâts nol doprave ni cremis solârs ni vistîts protetîfs.