"Si fa rete": un percors di formazion pe cure dai anzians cun fragjilitâts

Si è rivâts al tierç an di ativitât dal progjet “SI FA RETE – Sosteniamo Insieme la Fragilità dell’Anziano”, che al è il risultât di une colaborazion regjonâl e che al è finanziât de Regjon Autonome Friûl-Vignesie Julie cun risorsis statâls dal Ministeri dal Lavôr e des Politichis Sociâls. L'obietîf al è chel di imparâ a cjapâsi cure dai anzians de nestre regjon il miôr pussibil e meti in vore pratichis di assistence buinis.

“SI FA RETE” al cjape dentri lis organizazions no profit ACLI FVG, Associazione Aulòs,

Associazione de Banfield e lis Caritas diocesanis dal F-VJ; si fâs in Cjargne, cu la colaborazion dal Servizi Sociâl dai Comuns e dal Distret Sanitari de Cjargne, e di altris realtâts locâls dal Tierç Setôr.

Si trate di un percors di formazion gratuit che al è daûr a tacâ, un cicli di cinc incuintris publics dedicât ai caregivers (tiermin doprât par definî cui che al viôt di cualchidun), ma viert ancje a ducj i citadins, par imparâ a cjapâsi cure dai anzians cun fragjilitâts, dai aspiets burocratics fin a chei relazionâi.

I incuintris si fasaran ogni martars, des 14.00 aes 16.00, tacant di Dimpeç, dopo si larà a For Disot e infin a Preon. Il prin apontament al è martars ai 9 di Avrîl a Dimpeç, tes ex Scuelis di place dei Caduti, sul teme "Invecchiamento sano e patologico” (“L’invecjâ in maniere sane e patologjiche”) par imparâ a cognossi lis fragjilitâts e i prins segnâi di no trascurâ. Martars ai 16 di Avrîl l'incuintri si tignarà invezit tal Centri Diurni par Anzians "Mara Nassivera" di vie Baselia a For Disot, cul titul “L’approccio centrato sulla persona” (“L'obietîf al è la persone”), sul teme de cure de persone e dal ambient, cun cualchi nozion di pront socors e di cualis atenzion vê te cure.

Si va indevant ai 23 di Avrîl, ancjemò a Dimpeç, cun “Burocrazia e supporti economici” (“Burocrazie e aiûts economics”) dulà che si fevelarà dai dirits dal assistût e dal caregiver, des leçs ae part pratiche. Ai 30 di Avrîl si tornarà a For Disot pal apontament su “Suono, musica e abilità cognitive nell’anziano fragile” (“Sun, musiche e abilitâts cognitivis dal anzian fragjil”), cun aprofondiments sui imprescj e lis tecnichis di supuart pe cure dal anzian e utii pal caregiver.

Il percors si conclût a Preon ai 7 di Mai cul apontament tal viert (si cjatisi li dal Municipi), cul titul “La comunicazione con l’anziano fragile” (“Comunicâ cul anzian fragjil”) dulà che si daran sugjeriments pratics e propuestis tecnichis par comunicâ miôr cul propri anzian.

A son viertis lis iscrizions, che a son gratis. Par partecipâ ai incuintris al baste clamâ il numar 3397731201 o scrivi une email a info@sifarete.it

Il progjet al è inmaneât cu la colaborazion di: Servizi Sociâl dai Comuns e dal Distret Sanitari de Cjargne, Pro Loco di Preon, Cooperativa di Comunità Marimê, Associazione Anziani Volontariato Ampezzo e i Comuns di Dimpeç, Enemonç, For Disot, Preon, Sauris, Soclêf.

Par informazions
Mail: info@sifarete.it
pagjine Facebook dal progjet: @sifarete