Salta al contenuto principale
cîr
stanus daûr
joibe 19 di Novembar dal 2026

«Un dialic su sessualitât e cognizion»

Incuintri par fantats e zovins. Dartigne, ai 20 di Novembar

Parcè la nestre ment tindie spes a sotstimâ i pericui? Par cuâi motîfs la sessualitât ise ancjemò un tabù? Cuâi sono, tra i zovins, i risis plui grâfs provocâts des malatiis a trasmission sessuâl? L'incuintri «Un dialic su sessualitât e cognizion. Percezion dal risi e prevenzion» in program a Dartigne, te Sale consiliâr, vinars ai 20 di Novembar dal 2026, des 17 aes 19, si concentrarà su chestis e altris domandis.

Dilunc de serade - volude cun fuarce de Consulte dai Zovins di Dartigne, che tai ultins mês e je stade impegnade in incuintris di progjetazion e di cognossince dai servizis teritoriâi impegnâts te promozion dal benstâ e de salût sessuâl di fantats, zovins e adults - a saran aprofondîts varis aspiets dal teme. Il prin intervent al è intitulât Tra percezion e realtât: i limits de ment te valutazion dal pericul, e al sarà presentât di Ignazio Luciano, psicolic de Cooperative Aracon espert di neuropsicologjie. Il teme slargjât Cognossi par prevignî: i servizis pe salût sessuâl de Aziende sanitarie universitarie Friûl Centrâl si presentin al sarà svilupât a plui vôs. A intervignaran Katia Mauro, dirigjente mediche, e Cateno Mario Catalano, assistent sanitari, ducj i doi in servizi tal Ambulatori Malatiis Trasmissibilis par Vie Sessuâl dal Dipartiment di Prevenzion (Struture Operative Complesse Igjiene e Sanitât Publiche) de Aziende sanitarie universitarie Friûl Centrâl, e lis ostetrichis Camilla Del Moro, Martina Devoti e Stefania Martini che a son in servizi te Struture Operative Semplice Minôrs e Famee de Cjargne e dal Glemonàs, Cjanâl dal Fier, Valcjanâl de Aziende sanitarie.

L'incuintri al è viert a fantats e zovins tacant cu la classe tierce de Scuele Secondarie di prin grât, e al finirà cuntun ghiringhel.

La iniziative e je promovude de Consulte dai Zovins di Dartigne, dal Comun di Dartigne, de Aziende sanitarie universitarie Friûl Centrâl e dal Servizi sociâl dai Comuns dal ambit teritoriâl dal Glemonàs e dal Cjanâl dal Fier e Valcjanâl che si zove de colaborazion de Cooperative Sociâl Aracon, che e aderìs ae Associazion Temporanie di Imprese «Cooperativis Itaca – Universiis – CODESS FVG – Aracon».


data ultima modifica: 20 di Novembar dal 2026