Otante agns tal segn de solidarietât: il regâl di pre Romano ae Oncologjie di San Denêl
Une fieste a sorprese pai 80 agns e i 55 di sacerdozi si trasforme intune azion concrete di solidarietât: donât al repart di Oncologjie di San Denêl un misuradôr automatic di pression arteriose moderni.
Un travuart impuartant che al devente ocasion di gjenerositât e atenzion viers di chei altris: pre Romano Michelotti, fedêl al spirt di servizi che al acompagne di simpri il so percors uman e pastorâl, al à sielt di fâ fieste pai siei otante agns cuntune azion di solidarietât a pro dal ospedâl di San Denêl.
In ocasion dal so otantesim complean ai 29 di Zenâr, lis comunitâts di Vilegnove, Savonelis e Pignan a àn organizât une fieste a sorprese, il predi al à decidût di destinâ ae Oncologjie dal ospedâl de citât dute la some cjapade sù in gracie de gjenerositât di parochians e amîs.
La donazion e à permetût di comprâ un misuradôr automatic di pression arteriose moderni, un imprest preziôs par monitorâ in autonomie la pression e la frecuence cardiache dai pazients cuant che a acedin ae struture.
La sielte di sostignî l'ospedâl no je casuâl, ma e nas di un leam profont e di date viere. E derive di fats dal 1973, cuant che pre Romano, a pene rivât a San Denêl, al à tacât a prestâ servizi a flanc dal capelan di in chê volte, pre Enrico. Un impegn di vicinance e di atenzion aes personis maladis che, a distance di plui di cincuante agns, al va indevant ancjemò vuê, ogni volte che si presente la necessitât.
Il 2026 al è un an une vore significatîf par pre Romano, stant che dongje dal otantesim complean al è ancje il travuart dai 55 agns di ordenazion sacerdotâl, celebrade ai 19 di Març dal 1971. Figure di riferiment pal teritori, al è plevan di Pignan dal 2010, prime a Vilegnove e Savonelis dal 1982.
Presince costante, ative e simpri disponibile, al è stimât di dutis lis gjenerazions, ancje dai plui zovins, che lu clamin cun afiet «don 2.0» pe sô capacitât di stâ al pas cui timps.
Dongje dal so impegn pastorâl lunc e apassionât, pre Romano si è simpri dedicât cun grande passion ae musiche e ae valorizazion de lenghe e de identitât furlane. In dì di vuê al è president di Glesie Furlane, associazion impegnade te promozion dal patrimoni culturâl e religjôs furlan, e al à fondât e diret par cetancj agns il côr Vôs di Vilegnove.
La fieste a sorprese, tra cjants, brindis e une grande partecipazion, e à testemoneât ancjemò une volte l'afiet profont che al unìs lis comunitâts al lôr plevan.
La donazion ae Oncologjie e rapresente il proseguiment naturâl di une vite dedicade a chei altris: un moment di gjonde condividude che si tradûs intun benefici concret a pro dai pazients e di cui che ju assist ogni dì.
La Oncologjie di San Denêl e i pazients che si zovaran di chest gnûf imprest a ringraciin di cûr pre Romano e dutis lis personis che, cul lôr contribût, a àn rindût pussibil chest regâl preziôs.