Il Presidi Ospedalîr Sante Marie de Misericordie al jentre te rêt nazionâl "Ospivax"
Premiât cun 3 bolins pe eficience e pes iniziativis tal setôr des vacinis
L'Ospedâl di Udin al à otignût il ricognossiment di 3 bolins e di consecuence la adesion pal bieni 2026-2027 ae rêt nazionâl "Ospivax", dedicade ae ufierte di promozion vacinâl tal ambit dai ospedâi.
Ospivax, promovût dal "Osservatorio Italiano della Prevenzione" (OIP) e metût adun de "Fondazione Tendenze Salute e Sanità", al rapresente une rêt impuartante di ospedâi talians impegnâts in iniziativis di promozion e ufierte vacinâl tes lôr struturis. Il progjet al à l'obietîf di sensibilizâ su la impuartance des vacinazions, svilupant strategjiis di promozion indreçadis ai operadôrs sanitaris, ai pazients, soredut a chei des fassis fragjilis, a chei che a viodin di lôr e ai lôr familiârs, par garantî protezion e sigurece.
In particolâr, te sede di Udin, cul mês di Avrîl passât al è stât ativât tal paveon 1 dal Sante Marie de Misericordie un ambulatori vacinâl dedicât ai pazients des categoriis fragjilis e ai operadôrs sanitaris.
La procedure interne e previôt che i pazients fragjii a puedin jessi prenotâts suntune agjende dedicade dai specialiscj des Struturis che ju àn in cure (tra chestis a son la Cliniche Reumatologjiche, la Gastroenterologjie, la Cliniche Neurologjiche, la Cliniche Ematologjiche, la Pneumologjie, la Diabetologjie, la Nefrologjie, Dialisi e Traplant dal rognon); i operadôrs sanitaris invezit a son inviâts dal miedi aziendâl competent.
Tal ambulatori i pazients fragjii a cjatin un miedi de Struture di Igjiene e Sanitât Publiche, espert di vacinazions, e un assistent sanitari de Aree Vacinazions dal Dipartiment di Prevenzion, che a son a disposizion il prin par furnî lis informazions necessariis e une consulence vacinâl personalizade, e il secont par soministrâ lis vacinazions concuardadis.
Cheste iniziative e rispuint in particolâr ae indicazion dal Plan nazionâl di Prevenzion Vacinâl che al è in vore cumò di judâ un svicinament aes vacinazions fondât su lis necessitâts dal pazient, par rispuindi ae esigjence di facilitâ l'acès aes vacinazions a chês categoriis di personis che a àn plui bisugne.
La dot.e Francesca Valent, diretore de Struture di Igjiene e Sanitât Publiche de ASUFC: "Tal setôr des vacinis, al è impuartant lâ incuintri simpri di plui aes personis e aes categoriis plui fragjilis e che a fasin plui fadie tes azions di prevenzion principâls.
A Udin al è stât costruît, formalizât e inviât cun sucès un ambulatori dedicât, ancje cul coinvolzi simpri di plui e cuntune colaborazion simpri plui fuarte tra il Dipartiment di Prevenzion e i specialiscj clinics ospedalîrs che a individuin e a indrecin i lôr pazients fragjii al ambulatori vacinâl dedicât: il ricognossiment otignût al testemonie l'impegn di ASUFC tai confronts de salût publiche e de prevenzion des malatiis".