Oparis in vetrine!

Oparis in vetrine! Dai 17 di Otubar ai 6 di Novembar cu vegnin, in varis lûcs di Tumieç, si podaran amirâ i prodots fats intal ambit di “Metìnsi a fûc”, il progjet promovût dal Servizi sociâl dai Comuns dal ambit teritoriâl Cjargne – Aziende Sanitarie Universitarie Friûl Centrâl, in colaborazion cu la Cooperative Itaca e cu la Comunitât di Mont de Cjargne e fat in graciis dal impegn dal Ente Mostra Permanente della Carnia. Il progjet dilunc vie dal Istât dal 2022 al à cjapât dentri une novantine di fantats e di fantatis dai 11 ai 19 agns de Cjargne, intun viaç par scuvierzi lis cetantis musis che e à la art tant che strument di espression creative.

Il progjet, struturât in dîs laboratoris gratuits puartâts indenant di artesans e di artiscj dal teritori, al à permetût ai fantats di sperimentâsi metint dongje teorie e soredut tante pratiche; in cheste maniere ur è stade ufierte la oportunitât di esprimi se stes e, tal stes timp, di confrontâsi cui lôr coetanis viodint nassi in maniere direte des lôr mans i manufats.

Il rumôr di scarpel e maçûl al à dât il ritmi al laboratori di intai intal len là che Ermanno Plozzer al à dât ai fantats indicazions par dâ vite a mascaris tipichis dal arc alpin metudis in mostre li dal ISIS Fermo Solari. Il plasê di modelâ e la pazience no son mancjâts ai zovins che, acompagnâts di Emanuela Riccioni, si son metûts ae prove cu la ceramiche dant vite a ferâi, basrilêfs e tintinis metûts in mostre li di “Il Fornaio”.

Lis salis de biblioteche civiche “Adriana Pittoni” a dan acet ai elaborâts dai laboratoris di fumet e di art e piture, ducj i doi puartâts indenant di Barbara Picotti. Des taulis di “The Krown e il mistero di Palazzo Vecchio” e “Insane Kakashi” al ven fûr il lavôr di grup che al à puartât i fantats a ideâ in ogni detai i doi fumets; la creativitât e l'invît a lâ fûr dai schemis precostituîts al à caraterizât il percors sperimentâl di art e piture.

Emilia Di Monte e à stiçât i fantats a (tornâ a) scuvierzi cun voi diviers il mont che ur sta tor ator midiant dal obietîf de machine fotografiche; lis fotografiis metudis fûr li dal cine David e li dal ISIS Fermo Solari a mostrin i percors tematics realizâts in studi e intal cors des jessudis tal teritori.

Creativitât, manualitât e fantasie a àn puartât ae realizazion di acessoris unics intai laboratoris di tiessidure e di borsis. Siarpis coloradis, nassudis dai telârs che i fantats a àn provât a doprâ lant daûr des indicazions di Daniela Cargnelutti, a iluminin lis vetrinis di Mazzonetto, Antema, “Al Telar”, Merceria Fior Margherita e dal Ente Mostra Permanente della Carnia. Formis, materiâi e colôrs diviers a caraterizin lis borsis ideadis dai partecipants al laboratori puartât indenant di Antonella Stafutti e metudis in mostre li des vetrinis di “Sisters”, “Boutique della pelle”, “Seduzioni” e “Room 17”.

“... robe da pazzi” al è il spetacul teatrâl ideât dal grup dal laboratori di “arteatro” che al larà in sene ai 22 di Otubar aes 20.30 li dal teatri dal Coleç Don Bosco di Tumieç. Ducj i detais dal spetacul, dal titul al copion, a puartin la firme dai fantats pronts a lâ sù sul palc cu la regjie di Daniela Cargnelutti. Il spetacul viert al public al sarà la ocasion par ringraciâ e par dâ il “a riviodisi” ai partecipants di ducj i laboratoris che ur vignaran consegnâts i atestâts di partecipazion.

Dai 8 ai 28 di Novembar si podarà viodi i elaborâts di ducj i laboratoris li dal Ente Mostra Permanente della Carnia.

“Metìnsi a Fûc”, rivât ae cuarte edizion, al è un tassel impuartant des tantis ativitâts promovudis sul teritori cun e pai fantats dal Servizi Sociâl dai Comuns. Lis rispuestis de bande dai fantats e des fameis, colaborativis e cjapadis dentri, a metin in lûs la bontât di un progjet che, doprant il lengaç artistic, al à ufiert ai fantats un lûc di scolte e di confront, la oportunitât di scuvierzi talents e passions e, tal stes timp, di cjapâ sù e di potenziâ competencis manuâls che a puedin spindi ancje intal mont dal lavôr.