Invecjament atîf: esercizi, nutrizion, e sium di cualitât par prevignî il declin cognitîf
joibe 21 di Setembar dal 2023
Congrès a Palme sabide ai 16 di Setembar
Sabide ai 16 di Setembar, a Palme, si pontin i rifletôrs sul invecjament atîf, un teme une vore atuâl par vie dal progressîf, inarestabil invecjament de popolazion, un fenomen cun proporzions preocupantis, causât dal sprolungjament de durade de vite e de denatalitât decressinte.
La gjestion des fassis plui anzianis de popolazion e cjape dentri dutis lis figuris professionâls che a lavorin te aree sanitarie e e impegne tantis risorsis economichis, ancje parcè che spes si soreponin plui patologjiis cronichis te stesse persone.
I intervents di prevenzion su lis malatiis che a àn plui incidence te popolazion anziane, tant che lis malatiis cerebrovascolârs e lis demencis, a puedin invezit puartâ a une riduzion dal pês socioeconomic colegât a chestis.
La prevenzion, dut câs, no si fonde dome e prin di dut su lis medisinis, ma e à bisugne di intervents sul stîl di vite, tant che la atenzion pe nutrizion, la ativitât fisiche, la cualitât dal sium, la integrazion sociâl.
Al è ce che si definìs invecjament atîf, un teme che al cjape dentri la Neurologjie universitarie, direzude de Prof. Mariarosaria Valente, une dai protagoniscj di un sfuarç universitari dulà che la Universitât dal Friûl e je impegnade di agns, cul coordenament dal Prof. Gianluca Tell.
La cunvigne e sarà une buine ocasion par aprofondî chescj argoments cun ospits innomenâts. Tra chescj si segnalin l’ex president dal ISTAT, Prof. Blangiardo, il gnûf President de Societât Taliane di Neurologjie, Prof. Padovani, il President de Societât di Gjerontologjie e di Gjeriatrie, Prof. Trabucchi.
Sul finî de zornade, dopo des presentazions sientifichis, e je previodude ancje une session specifiche par un confront costrutîf tra lis variis figuris professionâls impegnadis tal cjamp dal invecjament. I organizadôrs a ritegnin, di fat, che la prevenzion pe terapie e pe riabilitazion e je fondamentâl par che lis rêts di colaborazion tra lis struturis ospedalieris e chês teritoriâls a funzionedin ben, cjapant dentri dutis lis figuris professionâls, soredut sanitariis, che a operin dongje dal anzian, in particolâr se fragjil.
Si auspiche che de cunvigne a saltin fûr sugjeriments interessants par dute la Sanitât regjonâl. De cualitât dai intervents sui anzians, di fat, e dipent la tignude di une societât solidarie, soredut in timps di risorsis finanziariis une vore limitadis.