E tache la campagne vacinâl cuintri de influence

La vacine cuintri de influence e je une vore impuartante par prevignî la influence stagjonâl e lis sôs complicazions, massime pes personis che a son plui fragjilis.

Dai 14 di Otubar e je tacade la campagne di vacinazion cuintri de influence, che e je gratuite par chestis categoriis: feminis in gravidance, fruts tra i 6 mês e i 6 agns, personis dai 60 agns finîts insù, personis cun cundizions di fragjilitât, familiârs e cui che al è dongje (adults e fruts) di personis cuntun risi alt di complicazions, donadôrs di sanc e lavoradôrs che a son stâts racomandâts di vacinâsi (e je in zonte la liste complete des categoriis che a son racomandadis di vacinâsi e che a puedin fâlu in maniere gratuite).

Si pues vacinâsi li dal propri miedi di medisine gjenerâl o li dal pediatri di libare sielte. Di chest an si pues fâ ancje tes farmaciis che a partecipin ae campagne vacinâl.

Ce ise la influence?

La influence e je une malatie respiratorie causade di un virus. Si trasmet midiant di piçulis gotutis di salive che si mandin fûr tal aiar fevelant, starnudant o tossint. Chestis gotutis a puedin jessi respiradis di cui che al è dongje o si poin su lis superficiis là che passant lis mans si cjape sù il virus e di li po dopo al passe tal nâs, te bocje o tai voi.

Ogni an si inmalin milions di personis, ma e je une vore pericolose pai anzians, pai frututs piçui, pai malâts cronics e par cui che nol à un sisteme imunitari bon.

Vacinâsi cuintri de influence al jude a ridusi il risi di infet, a no difondi il virus, a protezi se stes e lis personis plui fragjilis de comunitât. In particolâr, la vacine e covente par prevignî complicazions grivis tant che la polmonite.