Influence dai uciei in Friûl-Vignesie Julie: racomandazions gjenerâls

Si comuniche che, dopo che al è stât scuviert un câs di influence dai uciei intun arlevament familiâr di Purcie, la Aziende sanitarie Friûl ocidentâl e à tacât daurman a fâ controi midiant dal Dipartiment di prevenzion. Si è cjatât fûr un câs di infezion e si à decidût di copâ dutis lis bestiis, stant che il virus al è une vore infetîf. Cumò al è stât definît un perimetri di 10 chilometris ator dal arlevament di Purcie, che dentri a saran fats controi a campion in ducj i arlevaments e al sarà domandât ai titulârs se si son inacuarts di compuartaments stranis dai animâi. Se si cjataran altris infezions, si fasarà come a Purcie, si coparan dutis lis bestiis.

La influence dai uciei e je une malatie virâl, pal plui di chei salvadis. Chescj a fasin di serbatori e a puedin eliminâ il virus midiant dai escrements. Par solit i uciei salvadis no si inmalin, ma a puedin jessi une vore infetîfs pai uciei dumiestis tant che (ju disìn in ordin di pericul) dindis, razis, poleçs e altris animâi di curtîl.

La influence dai uciei e je une malatie pardabon infetive dai volatii. Si ben che i virus de influence umane e chei de influence dai uciei a partegnin ae stesse famee e gjenar, i virus dai uciei no son in stât di trasmetisi in maniere eficace al om, ma a puedin fâlu ogni tant e cun ciertis cundizions: par esempli, cul contat diret cun uciei muarts o inmalâts, o cul tocjâ superficiis o materiâi contaminâts di lavuachis o escrements infets o midiant des mucosis (orâls, oculârs, nasâls); o pûr cul aerosol infet, o mangjant cjar di uciei infets no cuete ben. Il personâl esponût a chest pericul al à di cjapâ dutis lis misuris di protezion individuâl. La malatie e je sogjete al oblic di denunzie.

I arlevaments comerciâi a son regjistrâts in maniere obligatorie inte Bancje Dâts Nazionâl, par chest i Servizis Veterinaris dal Dipartiment di Prevenzion a san dulà che a son e lis misuris che a son stadis cjapadis.

Calcolade la situazion di cumò de influence dai uciei su dut il teritori, i citadins che a vedin poleçs e altris volatii tignûts in struturis viertis, a àn di sierâlis e fâ dut ce che al covente par ridusi al minim il contat cun uciei salvadis. La misure restritive domandade e je disponude dal Ministeri de Salût (viôt ce che al è in zonte).

Dut câs, il Dipartiment di prevenzion al reste a disposizion:

ASUFC: vete@asufc.sanita.fvg.it  / asufc@certsanita.fvg.it 
ASFO: asfo.protgen@certsanita.fvg.it 
ASUGI: segr.veterinario@sanita.fvg.it / asugi@certsanita.fvg.it