Zornade di sensibilizazion sui tumôrs gjinecologjics promovude de ASUFC e di UNIUD
joibe 6 di Otubar dal 2022
Domenie ai 9 di Otubar
Tal mês dedicât ae prevenzion, la Universitât dal Friûl e la Aziende Sanitarie Universitarie Friûl di Mieç a promovin une zornade di sensibilizazion sul teme, domenie ai 9 di Otubar.
Mancul cognossûts a pet di altris patologjiis, tant che il carcinome tal sen, i tumôrs che a colpissin lis feminis, cjapant utar e ovadoriis, a son dispès une vore dificii di discuvierzi.
A tocjin 1 milion e 300 mil feminis tal mont ogni an; dome in Italie a son 18 mil i câs gnûfs.
Fâ i esams di screening e no sbassâ mai la vuardie.
In dì di vuê, par prevignî un tumôr, o dut câs par intercetâlu par timp, i struments a son, e a àn di jessi doprâts.
Lorenza Driul, Professore associade tal Dipartiment di Aree Mediche UniUD e Diretore de SOC di Gjinecologjie e Ostetricie de ASUFC, lu marche ogni dì e, se pussibil, ancje cun plui fuarce tal mês in cors, che si sa che al è dedicât ae prevenzion in ducj i siei aspiets.
E lu fâs dant une atenzion particolâr a une categorie di neoplasiis feminîls che a son mancul cognossudis a pet dal cancar tal sen, ancje se a son tumôrs une vore difondûts e plui dificii di ricognossi.
«Al è impuartant che Otubar al deventi soredut il mês de cussience par une part gjinecologjiche une vore delicade là che al è fondamentâl fâ une informazion costante – e evidenzie la Professore Driul, che propit su chest teme e à inmaneât une zornade di solidarietât, domenie ai 9 di Otubar, cu lis feminis za operadis –. In plui dal carcinome tal sen a son di fat ancje altris neoplasiis, tant che il tumôr des ovadoriis, dal cuel dal utar, dal endometri e de vulve che di lôr si sa ancjemò pôc: par esempli, sui fatôrs di risi e su lis manifestazions che dispès no vegnin cjapadis te considerazion juste. Al è duncje fondamentâl imparâ a ricognossi lis spiis che il cuarp al mande cence mai cjapâ sot gjambe la lôr pussibile gravitât».
Di fat, magari cussì no, lis diagnosis a son fatis masse tart e a tocjin feminis ancje une vore zovinis, che a àn mancul di 50 agns, cuntune riduzion impuartante des oportunitâts di sorevivence.
E pûr rivâ a fâje al è pussibil. Lu san ben chês pazientis za operadis par tumôrs gjinecologjics e che propit domenie ai 9 di Otubar a ricuardaran la impuartance di tignîsi cont e la pussibilitât, cun dut, di podê continuâ a vê une cualitât di vite buine.
A saran di fat lôr, adun cuntun grup di chirurcs de SOC di Gjinecologjie de ASUFC di Udin a jemplâ la motonâf de solidarietât che dal puart di Grau e partirà par Triest, bande la “Barcolana”.
«O vin inmaneât cheste zornade di condivision par manifestâ la nestre vicinance aes pazientis za operadis e vuaridis par meti dongje fonts a pro de LILT, la “Lega Italiana per la Lotta contro i Tumori”, e zonte, ricuardant che l’event, stant che a saran presints ancje i chirurcs, al sarà une ocasion preziose par miorâ la cognossince dai fatôrs di risi, de pussibilitât di diagnosi e des strategjiis preventivis a disposizion».
«Chel che lis feminis spes no san dai tumôrs feminîi al è che une buine part di lôr e tache di scuindon; al è duncje fondamentâl rivâ a individuâ i prins segnâi che a puedin jessi no tipics de malatie – al racomande il professôr Giuseppe Vizzielli, associât di Gjinecologjie e Ostetricie li dal DAME e Dirigjent medic de ASUFC intant che al ricuarde che il tumôr dal endometri, secont dopo dal cancar tal sen, al regjistre ogni an, in Italie, 5 mil câs gnûfs là che il tumôr des ovadoriis, che par chest in dì di vuê no son esams di screening, al cjape une femine su 72, cun 106 câs gnûfs ogni an in regjon – Cun dut achel, tai ultins timps a son stâts fats grancj pas indenant a nivel terapeutic midiant de scuvierte di intervents a bersai molecolâr che a smirin a intardâ o blocâ la cressite dal tumôr e che chi a Udin a son disponibii. L’impuartant al è indreçâsi ai Centris multidissiplinârs, dulà che si fâs ricercje, e curâ la prevenzion fasint almancul ogni an une visite di control gjinecologjiche».