La Zornade Mondiâl de Uldide ai 3 di Març dal 2023
joibe 2 di Març dal 2023
La pierdite de uldide, clamade in tiermins tecnics, “ipoacusie”, e je une cundizion une vore comune e frecuente. La Organizazion Mondiâl de Sanitât (OMS) e calcole che cirche il 20% de popolazion mondiâl e sedi tocjade di cheste malatie e che la stesse si manifesti in maniere invalidante in 430 milions di sogjets intal mont. La incidence dai problemis di uldide e cres cul cressi de etât e, cul aument de sperance di vite, simpri plui personis a son tocjadis. Par ridusi lis consecuencis negativis pussibilis, la pierdite de uldide e à di jessi identificade e tratade prin che si pues.
L’OMS e à duncje proclamât pai 3 di Març dal 2023 la “Zornade Mondiâl de Uldide” che e à l’obietîf declarât di sensibilizâ la popolazion sul teme dal deficit auditîf, un aspiet de salût che al à vuadagnât simpri plui interès sedi pal impat de sorditât su la cualitât di vite, sedi par vie che in dut il mont si è rilevât che lis curis adatis pes patologjiis de uldide a àn un acès limitât.
In sintonie cu la OMS, la Societât Taliane di Otorinolaringologjie e Chirurgjie Cervicofaciâl (SIOeChCF), cu la cooperazion de Societât Taliane di Audiologjie e Foniatrie (SIAF) e di 23 associazions (cence fins di vuadagn) di pazients e parincj di sogjets ipoacusics che a operin sul teritori nazionâl, e à convocât la II Zornade di Sensibilizazion de Uldide orientade a “Sensibilizâ la cure de orele e de uldide intal ambit des curis primariis”.
Inte suaze di cheste manifestazion, lis trê Struturis Operativis Complessis di Otorinolaringoiatrie di Udin, Tumieç e Tisane, che a fasin part de Aziende Sanitarie Universitarie - Friûl Centrâl, in colaborazion cul Ordin dai Miedis Chirurcs e dai Odontoiatris de provincie di Udin a àn inmaneât, pai 23 di Març dal 2023, un incuintri formatîf on line cui Miedis di Medisine Gjenerâl, par condividi lis cognossincis plui inzornadis sui problemis di uldide e definî i percors di diagnosi e di cure de ipoacusie plui eficaçs.
La uldide e je fondamentâl par sintî, capî e comunicâ cu lis peraulis e la orele e je un orghin di sens une vore complès e delicât che al à bisugne di protezion. Fatôrs diferents a puedin comprometi la nestre orele, par esempli farmacs particolârs, virus e traumis acustics che zontantsi tal arc de vite a causin une incidence plui alte inte fase adulte e anziane. Si calcole di fat che la ipoacusie e vedi une prevalence di cirche il 40-50% intes personis cun plui di 75 agns.
Il no frontâ la pierdite de uldide al pese su la economie globâl cuntun cost di 980 miliarts di dolars ogni an par coscj dal setôr sanitari (gjavât il cost dai aparâts acustics), dal supuart educatîf, de pierdite di produtivitât e pai coscj sociâi. Cun di plui, studis resints a concuardin sul fat che il deficit auditîf al contribuìs al degrât dai sogjets in tiermins di socialitât, sensibilitât, cognizion e cualitât di vite.
Par chescj motîfs, identificâ e tratâ daurman al è fondamentâl par prevignî un deteriorament globâl. Ricognossi cun precocitât i sintoms de sorditât e dai problemis de orele al è essenziâl par podê intervignî sedi su lis causis pussibilis sedi par ridusi al minim la disabilitât che e derive.
Plui dal 60% dai problemis di uldide si lu pues identificâ e frontâ cu lis curis primariis; la integrazion tra il miedi specialist (otorinolaringoiatri o miedi audiolic) e i servizis di assistence primarie e pues puartâ a vantaçs evidents pe persone.
La Zornade Mondiâl de Uldide e je ancje la ocasion par presentâ la costituzion, une vore resinte, te Otorinolaringoiatrie de Aziende Sanitarie Universitarie - Friûl Centrâl di Udin, direte dal Prof. Cesar Miani, dal Centri Otorinolaringoiatric di Diagnosi e Riabilitazion Audio Logopediche (CODRAL), une rêt di miedis specialiscj e tecnics che e ufrìs lis curis miôrs ai utents che a patissin di ipoacusie di cualsisedi origjin e gravitât. In dì di vuê, di fat, il tratament des ipoacusiis si zove dai progrès tecnologjics che a furnissin soluzions personalizadis daûr des diviersis formis di sorditât, sedi dal adult che dal frut: des protesis acustichis 2 tradizionâls - par altri aromai une vore digjitâls - aes protesis che si puedin implantâ par vues, rivant fin ae aplicazion dai implants cocleârs (orele bioniche) tal câs di une ipoacusie severe e profonde, zontant in dutis chestis situazions une riabilitazion smirade fate dopo che la protesi e je stade metude.