Ai 13 di Març dal 2025: Zornade Mondiâl dal Rognon

Joibe ai 13 di Març si celebre la Zornade Mondiâl dal Rognon e ancje la ASUFC e partecipe cu lis iniziativis inmaneadis de Struture di Nefrologjie e Dialisi di Udin, direte dal dot. Giuliano Boscutti.

La FIR (Fondazione Italiana Rene), o sedi la Onlus che dal 2001 e promôf ogni an cheste zornade midiant di dutis lis struturis di nefrologjie talianis, e je ative par miorâ la comunicazion e la colaborazion tra dutis lis personis che ogni dì si impegnin par prevignî lis malatiis dal rognon e par slargjâ simpri di plui la cognossince de prevenzion, de diagnosi e de cure des malatiis dal rognon.

Chest an la Societât Internazionâl di Nefrologjie (ISN) e la Federazion Internazionâl des Fondazions Renâls (IFKF-WKA) a promovin il sproc: “Cemût stano i tiei rognons? Promovi la diagnosi precoce e la protezion de salût dai rognons”.

Chest al è un teme cruciâl che al riclame la impuartance de diagnosi precoce e de protezion de salût dai rognons, e al rimarche che i pazients a àn di jessi cussients dai fatôrs di pericul de malatie renâl e des misuris di prevenzion e di protezion che a puedin protezi i rognons di une evoluzion de malatie.

La dotore Alessandra Marega, specialiste de Struture dal Ospedâl di Udin e referente de FIR F-VJ: “La Zornade Mondiâl dal Rognon e ufrìs une oportunitât impuartante par interessâsi dai rognons, orghins che no son calcolâts plui di tant parcè che no si ju cognòs: a patissin cidins e si pandin malâts cuant che aromai al è masse tart".

Il teme des iniziativis al sarà in particolâr la prevenzion primarie (evitâ che il rognon si inmali) e secondarie (ralentâ la malatie cuant che si è inviade) de malatie renâl croniche, pal impat fuart che e à su la salût de persone ma ancje sui familiârs e su dute la societât.

Doi incuintris vierts a dute la popolazion si fasaran tes bibliotechis di Laipà e di Cividât:

• miercus ai 12 di Març aes 18.00 li de Biblioteche di cuartîr di Laipà - San Gotart (viâl Forze Armate, 4 Udin)
• joibe ai 13 di Març aes 18:00 li de Biblioteche di Cividât (plaçute Chiarottini, 4)

"O sperìn che a sedin tancj i citadins che a parteciparan a chestis iniziativis - e conclût la dotore Marega - e tant che specialiscj o restìn a disposizion dai utents par cualsisei sclariment che nus vuelin domandâ e, tal câs, aprofondì in mût adeguât li des Struturis di Nefrologjie".

I dâts

Si calcole che la malatie renâl croniche (MRC) e tocji uns 850 milions di personis tal mont: se e ven diagnosticade tart o se no ven tratade adore e pues lâ indenant fin a causâ complicazions griviis e une mortalitât alte.

In Italie e interesse cirche il 10% de popolazion adulte, e si pues manifestâ a ogni etât cun frecuence diferente, basse tai zovins (pal plui causade di malatiis renâls primitivis), une vore alte tai anzians.

In dì di vuê la malatie renâl e je la otave cause di muart e si previôt che e deventarà la cuinte dentri dal 2040, se no si le fronte adore e in mût adeguât.

Lis misuris di prevenzion

A son tantis lis misuris di prevenzion che a puedin difindi i rognons di une evoluzion de malatie che, se no ven curade, e pues puartâ a vê bisugne de dialisi o dal traplant. I fatôrs di pericul plui impuartants a son la ipertension arteriose, il diabete melit, la malatie cardiovascolâr, la obesitât, la familiaritât pe malatie renâl.

8 regulis di aur par prevignî lis malatiis renâls

1. Mantegniti atîf e in buine forme
2. Controle cun regolaritât i nivei di zucar tal sanc
3. Controle cun regolaritât la pression dal sanc
4. Viôt di vê une alimentazion sane e belançade
5. Consume licuits in maniere adeguade e regolâr
6. No stâ a fumâ
7. Cjol lis medisinis dome cul control dal miedi
8. Ten controlade la funzion renâl (azotemie, creatinine, esam des urinis), massime se tu sês un sogjet plui vulnerabil

Controlâ la pression des arteriis e fâ pôcs esams dal sanc e des urinis a son imprescj une vore sempliçs par vê une diagnosi precoce di dutis lis malatiis renâls fin di zovins.