Ai 28 di Lui: zornade mondiâl cuintri de epatite
Jentrade direte te zornade tal Dipartiment di Prevenzion di Udin
Ai 28 di Lui di ogni an la Organizazion Mondiâl de Sanitât (OMS) e celebre la Zornade Mondiâl cuintri de Epatite, che e je une ocasion par sensibilizâ la opinion publiche e lis istituzions e par divulgâ informazions suntun probleme di salût che al è mondiâl.
Lis epatitis a son un grup di malatiis ancjemò une vore difondudis: pal plui a son virâls, a durin tal timp e a debilitin.
Un front viert al è chel de epatite C, che e je forsit la forme plui platade e pericolose: la Italie e je il Paîs european cul numar plui alt di puartadôrs dal virus. La OMS e à promovût une strategjie par eliminâ la epatite a nivel globâl dentri dal 2030 si che ducj i guviers dai Paîs industrializâts, cu la Italie da cjâf, a àn adotât misuris in merit. Si podarà rivâ a chest obietîf midiant de ultime introduzion di gnûfs farmacs antivirâi, che a àn une eficacie elevade e pôcs efiets colaterâls, e che a permetin di vuarî a cirche il 90% dai sogjets tratâts.
La Regjon Friûl-Vignesie Julie, in linie cu lis indicazions ministeriâls, e à promovût un program che si pues acedi in maniere gratuite, pes personis nassudis tra il 1969 e il 1989, cul fin di rilevâ la positivitât ae infezion dal virus de epatite C e di inviâ i pazient al tratament, evitant cussì complicazions gravis.
Te ocasion de Zornade Mondiâl cuintri de Epatite dai 28 di Lui, la Regjon, in colaborazion cu lis Aziendis Sanitariis, e à inmaneât la viertidure straordenarie di cualchi centri dulà che i sogjets individuâts dal program (nassûts tra il 1969 e il 1989 e iscrits te anagrafe sanitarie regjonâl) a puedin lâ par fâ il prelêf dal sanc, cence impegnative dal miedi e cence prenotazion, tai oraris che a son ripuartâts chi sot.
In particolâr, te ASUFC e je previodude la jentrade direte tai ambulatoris vacinâls dal Dipartiment di Prevenzion di Udin, vinars ai 28 di Lui des 8.00 aes 14.00.
Par vê plui informazions al è pussibil clamâ il numar 0432 553221.