Screening regjonâl pal HCV (epatite C)

Ce isal?

Al è un esam par oms e feminis che a àn il domicili sanitari inte nestre Regjon, che a son nassûts tra il 1969 e il 1989 e che, midiant di un prelêf di sanc, al permet di identificâ la presince dal virus che al cause la epatite C (HCV) e di fâ par timp i trataments farmacologjics che a coventin, prime che la infezion si disvilupi in malatiis gravis tant che la cirosi o il tumôr dal fiât.

Cemût si puedial fâ?

Ducj i citadins cu lis carateristichis che o vin a pene descritis, vie pal an a ricevaran une letare di invît a partecipâ, e a prenotaran il prelêf intun dai tancj centris aziendâi. Par prenotâ si pues indreçâsi ai sportei CUP di ASUFC, al Call Center (tel. 0434 223522) e aes farmaciis abilitadis.

E se no ai ricevude ancjemò la letare?

Al è pussibil fâ l’esam ancje prime di ricevi la letare di invît. Al baste domandâ tes sedis de ASUFC, in ocasion di altris prenotazions o pûr di prelêfs, esams, visitis o altris prestazions, se al è pussibil fâ daurman ancje il prelêf par chest screening.

Dulà si viodial il risultât dal test?

I citadins a podaran viodi il risultât dal esam midiant dal Fassicul Sanitari Eletronic.

Se e ven cjatade la infezion di epatite C (HCV), ce sucedial?

In câs di positivitât dal screening, si vignarà contatâts par fâ une visite intun centri specialistic di riferiment, par altris aprofondiments e par inviâ la terapie.

Ce costial?

Nuie! Il screening al è gratis.