Glemone: donazion de bande di Prima Cassa di un ecograf portatil pai pazients domiciliârs dal Friûl de Alte

Vinars ai 10 di Mai dal 2024, te sale Lodolo dal Presidi Teritoriâl di Glemone, al è stât consegnât in vie uficiâl l’ecograf portatil che la filiâl di Glemone di Prima Cassa - Credito Cooperativo FVG e à donât al Distret Sociosanitari dal Glemonàs, dal Cjanâl dal Fier e de Valcjanâl.

“O ringracii il Diretôr de filiâl di Glemone di Prima Cassa, dotôr Ludwig Gubiani, il President dal Ente Obiettivo Benessere, dotôr Giuseppe Varisco, e i lôr colaboradôrs, pe preziose e gjenerose donazion al personâl dal Distret Sociosanitari”, al à declarât il Diretôr Sanitari, dotôr David Turello, che po al à zontât: “Chest dispositîf (ecograf portatil VSCAN colegât vie WiFi cuntun tablet) al permet di incressi lis potenzialitâts diagnostichis dal jet che il pazient al dopre a cjase sô, cence scugnî lâ tes Struturis Sanitariis (ospedâl par prin). Dut chest cu la prospetive di meti adun la ecuitât di acès e la prossimitât des curis ancje par chei utents che a son a stâ intai puescj plui lontans dal Presidi Teritoriâl di Glemone e di Tarvis.”

Il dotôr Alessandro Cigalotto, specialist dal Servizi Medic Mobil Teritoriâl (SMMT) che al opere intal teritori dal Distret Sociosanitari, massime a cjase dai pazients che a son obleâts a stâ tal jet, al à spiegât che doprâ ogni dì chest imprest sul teritori al permetarà di fâ esams ecografics cun finalitâts diagnostichis (ecografiis adominâls, toracichis, vascolârs), ma ancje terapeutichis (paracentesi evacuative, posizionament di catetars vascolârs o de vissie), cun chê di evitâ in plui dal 90% dai câs il trasferiment in ospedâl dai pazients che a son dificii di traspuartâ.

Cun di plui, Turello al precise che “L’ecograf al zovarà soredut aes categoriis di pazients consideradis “fragjilis”, ven a stâi i pazients anzians cun plui patologjiis cronichis e i pazients oncologjics, o ben chei dulà che il contest di cure e di vite a coincidin e li che la disponibilitât di specialiscj e di prestazions di cualitât bed-side e fâs la diference.”

“Al è ancje midiant di colaborazions come cheste”, al siere Turello, “che al è pussibil vê tant che obietîf chel di dâ ai nestris assistûts curis ciertis e di cualitât in situazions diferentis, cjapant dentri ancje l’ambit domiciliâr; cheste e je la mission principâl de Aziende Sanitarie dal Friûl Centrâl.”