Fondazione Onda, Osservatori nazionâl su la salût de femine e di gjenar, e premie 367 realtâts ospedalieris

Fondazione Onda: e cres la rêt dai Ospedâi cul Bolin Rose, premiadis 367 realtâts tal nestri Paîs. Il ricognossiment assegnât ai ospedâi impegnâts, in dutis lis regjons talianis, te promozion de medisine di gjenar, fasintsi cognossi pe ufierte di servizis dedicâts ae prevenzion, diagnosi e cure des principâls patologjiis femininis e no dome.

Lis schedis cu lis informazions sui servizis dai ospedâi premiâts si puedin consultâ sul sît www.bollinirosa.it

Rome, ai 30 di Novembar dal 2023 – Fondazione Onda e à assegnât i Bolins Rose pal bieni 2024-2025 ai ospedâi che a ufrissin servizis dedicâts ae prevenzion, diagnosi e cure des principâls patologjiis che a rivuardin l’univiers feminin, ma ancje chês che a tocjin in maniere trasversâl oms e feminis cjalant la diversitât di gjenar. A pet dal bieni stât, i ospedâi premiâts a son di plui, lant di 354 a 367. Di là di une cressite in numars, o stin viodint un miorament cualitatîf dai servizis furnîts: i ospedâi che a àn vût il ricognossiment massim, cun trê Bolins, a son di fat passâts di 107 dal ultin Bant a 126 di cheste edizion. 188 struturis a àn cjapât doi Bolins e 53 un Bolin. La premiazion e je stade fate intune cerimonie che si è davuelte li dal Ministeri de Salût.

“La edizion decime prime dai Bolins Rose, che e à il patrocini di 31 ents e societâts sientifichis”, e dîs Francesca Merzagora, Presidente de Fondazione Onda, “e rinove il nestri impegn te promozion di une metodiche gender-oriented tes struturis ospedalieris, ricognossint la impuartance di servizis e di percors a misure di femine, in dutis lis areis specialistichis, che si segnalin pe cualitât e pe justece des prestazions furnidis. I Ospedâi premiâts cul Bolin Rose a vegnin valutâts lant daûr sei des specialitâts cun plui impat epidemiologjic te suaze de salût feminine, sei di chês che a curin patologjiis che par solit a colpissin ducj i doi i gjenars, ma in maniere personalizade. Cun di plui, a son tignûts in cont l’acet e l’acompagnament des feminis e i servizis ufierts pe gjestion di vitimis di violence. I 367 ospedâi premiâts a fasin une rêt di scambi di esperiencis e di prassi virtuose, un canâl di divulgazion sientifiche par promovi l’inzornament dai miedis e dai operadôrs sanitaris. Tal stes timp, i ospedâi cul Bolin Rose a rapresentin pe popolazion la oportunitât di podê sielzi il lûc di cure plui adat pes necessitâts personâls, e ancje di doprâ servizis a gratis te casion di zornadis dedicadis a patologjiis specifichis, cun chê di sensibilizâ e di svicinâ a diagnosis e a curis adatis.

La valutazion des struturis ospedalieris e la assegnazion dai Bolins Rose e je stade fate midiant di un cuistionari di candidature fat di cirche 500 domandis, ognidune cuntun valôr prestabilît, dividût in 15 areis specialistichis, plui une sezion dedicade ai servizis gjenerâi par dâ acet aes feminis e une pe jestion dai câs di violence su lis feminis e sui operadôrs sanitaris. Un Advisory Board (Comitât Consultîf) di pueste, cu la presidence di Walter Ricciardi, Professôr di Igjiene Publiche te Universitât dal Sacro Cuore di Rome, al à fat bogns i Bolins otignûts dai ospedâi (zero, un, doi o trê) daûr dal calcul dai ponts in totâl cjapât te candidature, tignint cont ancje dai elements cualitatîfs di impuartance particolâr no valutâts midiant dal cuistionari (servizis e percors speciâi, iniziativis e progjets particolârs e vie indevant).

I criteris di valutazion tignûts in cont a son stâts trê: la presince di specialitâts clinichis che a tratin problemis di salût tipics des feminis e trasversâls ai doi gjenars che a àn bisugne di percors diviers; tipologjie e justece dai percors diagnostics e terapeutics e i servizis clinics e di assistence in suaze multidissiplinâr gender-oriented; la ufierte di servizis relatîfs al dâ acet aes feminis a supuart dai percors diagnostics e terapeutics (volontaris, mediazion culturâl e assistence sociâl) e, in ultin, il nivel di preparazion dal ospedâl pe gjestion di vitimis di violence fisiche e verbâl. Dilunc de cerimonie di premiazion, al è stât ancje assegnât un ricognossiment speciâl a 34 Referents Bolin Rose che si son segnalâts vie pai agns pal impegn e l’entusiasim a pro des iniziativis di Fondazion Onda.

Sul sît www.bollinirosa.it al è pussibil consultâ lis schedis dai ospedâi premiâts, dividûts par regjon, cu la liste dai servizis valutâts.

“Une prestazion sanitarie di nivel alt, une alte competence specialistiche metude adun cu la atenzion al pazient e al so benstâ globâl cjapât intune otiche di gjenar, cuntun rivuart particolâr ae gjestion dai câs di violence viers des feminis e i operadôrs sanitaris. Cheste e je la filosofie doprade ancje chest an dal Advisory Board (Comitât Consultîf) par assegnâ i Bolins Rose promovûts de Fondazion Onda” al sclarìs Walter Ricciardi, Professôr ordenari di Igjiene e Sanitât Publiche de Universitât Cattolica dal Sacro Cuore e President Comission Bolin Rose. “ A son un segnâl reâl de atenzion che medisine, sanitât e assistence a indrecin bande lis feminis cirint di praticâ une medisine moderne, cussiente de complessitât che la specificitât di gjenar e domande. Mi auguri che a sedin simpri di plui i ospedâi candidâts a bolins come chest”. “Lis speziariis a lavorin in maniere ative par difondi la culture de medisine di gjenar, promovint esams di prevenzion smirâts, par esempli des malatiis cardiovascolârs che a àn sintoms une vore diferents tra feminis e oms. Te speziarie o lavorìn ogni dì par informâ in maniere clare e corete lis feminis, par che a podedin cjapâ cure de lôr salût”, al dîs Marco Cossolo, President nazionâl di Federfarma.

“Chel de salût al è simpri stât un setôr presidiât de Aon. Lis aziendis a àn un rûl determinant te tutele de salût dai lôr dipendents e, slargjant il discors, dal lôr nucli familiâr; ce che o stin viodint al è un sens di responsabilitât in cressite sei te promozion dal benstâ psicofisic des personis, sei te sensibilizazion ae prevenzion. O sin pardabon braurôs di sostignî di tancj agns in ca la iniziative Bolins Rose de Fondazione Onda”, al declare Luca Franzi de Luca, vice President esecutîf di Aon Spa. “Cheste iniziative e fronte un teme centrâl come la paritât di gjenar, ricognossint lis specificitâts dai doi univiers, feminin e masculin, e promovint diagnosis fatis miôr e percors di cure smirâts di bande des struturis ospedalieris. La Fondazione Onda e à dât un contribût impuartant pal svilup de medisine di gjenar e e larà indevant a fâlu”.

La iniziative Bolins Rose si zove de colaborazion cun mass media tant che Adnkronos, Baby Magazine, Panorama della Sanità, Salutare e Tecnica Ospedaliera, e à il patrocini di AGENAS – Agenzia Nazionale per i Servizi Sanitari Regionali, AIDM – Associazione Italiana Donne Medico, AMD - Associazione Medici Diabetologi, ANISC - Associazione Nazionale Italiana Chirurghi Senologi, AOGOI – Associazione Ostetrici Ginecologi Ospedalieri Italiani, Centro Studi Nazionale su Salute e Medicina di Genere, FEDERFARMA, FIASO - Federazione Italiana aziende sanitarie e ospedaliere, Fondazione AIOM, Istituto Superiore di Sanità, SIC - Società Italiana di Cardiologia, S.I.CO.B. - Società Italiana di Chirurgia e Obesità e delle Malattie Metaboliche, SID - Società Italiana di Diabetologia, SIDeMaST - Società Italiana di Dermatologia medica, chirurgica, estetica e delle Malattie sessualmente trasmissibili, SIE - Società Italiana  di Endocrinologia, SIFES e MR - Società Italiana di fertilità e sterilità, SIGO - Società Italiana di Ginecologia e Ostetricia, SIMEU - Società Italiana Medicina di Emergenza e Urgenza, SIMG - Società Italiana di Medicina Generale, SIN - Società Italiana di Neonatologia, SIN - Società Italiana di Neurologia, SINPF - Società Italiana di Neuropsicofarmacologia, SINU - Società Italiana di Nutrizione Umana, SIO - Società Italiana di Obesità, SIOG - Società Italiana di Oncologia Ginecologia, SIOMMMS - Società Italiana di Osteoporosi del Metabolismo Minerale e delle Malattie dello Scheletro, SIP - Società Italiana di Pneumologia, SIP - Società Italiana di Psichiatria, SIR - Società Italiana di Reumatologia, SIUD - Società Italiana di Urodinamica, SIUrO - Società Italiana di Uro-Oncologia e e je stade pussibile in graciis dal contribût cence limits di Aon Italia.