“Comunitât educante: tignîsi cont, insiemi”: cicli di incuintris a Sapade

Si è davuelte ai 28 di Zenâr la prime serade dal itinerari “Comunitât educante: tignîsi cont, insiemi”. Un percors su temis educatîfs indreçât a gjenitôrs, insegnants, alenadôrs e a ducj chei che a àn a cûr l'agjî educatîf.

Il cicli di incuintris gratuits, promovût de Associazion “Genitori Scuole Sappada Plodn”, si jere fermât dopo dôs seradis intal 2020 par vie de pandemie. Cu la poie dal Comun di Sapade e la colaborazion dal Istitût Comprensîf di Comelians, la Associazion e à proponût al Servizi sociâl dai Comuns dal ambit teritoriâl Cjargne – ASU FC, che al veve condividût la progjetazion doi agns prime, di tornâ a partî cul progjet, inzornant tal stes timp la interpretazion des dibisugnis dai adults e dai fruts, dai fantats e dai zovinis al moment dopo de pandemie.

Il percors inviât intal 2020 al zirave ator de peraule INSIEMI, cu la convinzion che si podès e si ves di condividi lis fadiis e lis gjondis dal jessi educadôrs, sigûrs dal fat che nissun si eduche di bessôl o al eduche di bessôl e che se i adults che a educhin a lavorin in scuadre in maniere cussiente, atente e madure, i fruts e i fantats si zovaran di chest e a varan une cressite ecuilibrade e serene.

INSIEMI al è ancjemò tal centri dal percors e al è il so motôr propulsôr, inmò di plui dopo che la pandemie e à tacât cun fuarce la dimension comunitarie e sociâl: chel che nus à puartât vie al à metût in lûs la pussibilitât di dâ valôr a ce che al conte pardabon e ae dibisugne di incuintrâ il prossim.

Propit par chest motîf la modalitât dai incuintris e rimande ae dibisugne di condivision, alternant moments informatîfs cun spazis di condivision tra i presints e di riflession personâl.

I prossims incuintris si fasaran simpri di martars: ai 28 di Fevrâr, ai 28 di Març, ai 18 di Avrîl e ai 23 di Mai dal 2023, aes 20.00, te sale consiliâr dal Comun di Sapade.

L’incuintri dai 28 di Fevrâr al darà continuitât ai temis frontâts in chel dai 28 di Zenâr (“Stâ ben in famee: un zûc di scuadre”) e al esplorarà cemût “Frontâ cun cussience lis fasis di disvilup de famee”, che come ducj i organisims vivents e passe moments diferents, cun bisugns specifics dai siei components che a domandin la capacitât, massime tai adults, di frontâ il cambiament. Su chestis capacitâts i fîs a puedin imparâ cemût rivâ a stâ intal cambiament in maniere proative e serene. L’incuintri al è par cure de dot.e Giulia Sillani, psicolighe di comunitât che e fâs part de Cooperative Itaca e che e lavore tal Servizi sociâl dai Comuns de Cjargne.

Ai 28 di Març si fevelarà di “Adolessence: meti al mont un om, une femine. Acetâ e sostignî il conflit pal benstâ dai fantats”: la adolessence e je un dai moments educatîfs plui complès e tal stes timp plui gjeneratîfs par ducj i adults che lu frontin. L’incuintri al è par cure dal Servizi sociâl dai Comuns de Cjargne.

Graciis ae colaborazion cu la Associazion Oncologjiche Alt Friûl, che e à acetât di gnûf l’invît a partecipâ a chest percors, ai 18 di Avrîl si fevelarà di “Di là dal tabù de muart: il dialic cence fin tra pierdite e vite” e ai 23 di Mai si frontarà il teme dal titul “Lis peraulis par dîlu: comunicâ su la esperience di malatie”. Doi incuintris confermâts, come inte prime edizion, pe impuartance che al à, tant che educadôrs e adults, il savê stâ cui fruts e cui fantats, e il dialogâ cun lôr su cuistions fondamentâls de esistence, e che a cheste i dan significât.

La bielece e la maravee dal educâ, dal tirâ sù une vite zovine, a son intatis e si platin intal viaç che al met tal mont ancje ogni altri adult che al eduche. L'invît, duncje, al è chel di cjatâsi tra adults in cjamin par fevelâ di chest e provâ a fâ simpri miôr, cuntune dedizion particolâr a educâ il cuarp, la ment, il cûr e il spirt in ecuilibri. Par sintîsi mancul di bessôi te inciertece, acetant la fragjilitât umane di ognidun, tornant a scuvierzi la ricjece di une comunitât che si ten cont. Insiemi.