Comunitât educante: tignîsi cont, insiemi

Si tignarà lunis che al ven, ai 15 di Zenâr a Dimpeç, te Sale Unfer dal Museu Gjeologjic, la serade di presentazion dal itinerari “Comunità educante: prendersi cura insieme” (“Comunitât educante: tignîsi cont insiemi”), un percors su tematichis educativis indreçât a gjenitôrs, insegnants, alenadôrs, volontaris e a ducj chei che a son interessâts al agjî educatîf.

Il cicli di incuintris gratuits, promovût des Aministrazions comunâls di Dimpeç, Enemonç, For Disore, For Disot, Lauc, Preon, Raviei, Sauris, Soclêf, Vile di Cjargne cu la colaborazion dal Istitût Comprensîf Val dal Tiliment, al vignarà puartât indenant dal Servizi sociâl dai Comuns dal ambit teritoriâl Cjargne – ASU FC, de Cooperative Itaca e de Associazion Oncologjiche dal Friûl de Alte ODV.

Il percors al è rivât ae sô seconde edizion in Cjargne: dopo di une prime esperience a Sapade tal 2023, che e à vût sucès fra i partecipants, si è volût tornâ a proponi cheste iniziative tal teritori de Val dal Tiliment.

Il cicli di incuintris al è incentrât su la peraule INSIEMI e al è un spazi protet par condividi lis fadiis e lis gjondis dal jessi educadôrs (gjenitôrs, insegnants, alenadôrs, catechiscj, volontaris in associazions...) tacant de convinzion che nissun si eduche di bessôl ni al eduche di bessôl e che se i adults che a educhin a fasin un zûc di scuadre cussient, atent e madûr, i fruts e i fantats a puedin zovâsi di cheste dinamiche par cressi in maniere ecuilibrade e serene. La dimension comunitarie e sociâl e je il cûr dal percors, intun dialic atent e che al rispiete la dimension de persone e de sô singolaritât. La modalitât dai incuintris e ten cont di chest dialic tra il singul e la comunitât, alternant moments informatîfs cun spazis di condivision tra i presints e ativitâts di riflession personâl.

I incuintris si davuelzaran aes 20.00 te sale Unfer dal Museu Gjeologjic di Dimpeç cun chest calendari:

• cu la dot.e Giulia Sillani de Cooperative Itaca, psicolighe di comunitât dal Servizi Sociâl dai Comuns de Cjargne, lunis ai 5 di Fevrâr dal 2024 si fevelarà di “Star bene in famiglia: un gioco di squadra” (“Stâ ben in famee, un zûc di scuadre”) e lunis ai 19 di Fevrâr dal 2024 di “Be prepared: tutti i cambiamenti che una famiglia affronta” (“Be prepared: ducj i cambiaments che une famee e fronte”). La famee e je un organisim vivent e propit par chest e passe par moments diferents, cun dibisugnis specifichis dai siei components che a domandin la capacitât, massime tai adults, di frontâ il cambiament in maniere proative e serene. Pensâsi tant che une scuadre e agjî in chê direzion al jude i gjenitôrs, adun cui fîs, a stâ ben, dentri e fûr di cjase.

• Lunis ai 4 e ai 25 di Març dal 2024, si fevelarà di “Adolescenza: mettere al mondo un uomo, una donna” (“Adolessence: meti al mont un om, une femine) e di “Adolescenza: accogliere e sostenere il conflitto per il benessere dei ragazzi” (“Adolessence: acetâ e sostignî il conflit pal benstâ dai fantats”). La adolessence e je un dai moments educatîfs plui complès e tal stes timp plui gjeneratîfs par ducj i adults che lu frontin.

La volontât e je chê di proponi une vision che no sedi ni alarmiste ni di patologjizazion de adolessence, promovint une riflession su trop che la adolessence, une seconde nassite, e meti al mont gnûfs gjenitôrs, gnûfs insegnants, gnûfs alenadôrs. Un timp che al rint gnûfs, in pratiche, di acetâ tal so travai (tal sens di lavôr dal profont). L’incuintri al è curât di Gaia Pecile, pedagogjiste, educadore dal Servizi sociâl dai Comuns de Cjargne.

• Martars ai 9 e ai 23 di Avrîl dal 2024 si fevelarà di “Oltre il tabù della morte: l’Inesauribile dialogo tra perdita e vita” (“Di là dal tabù de muart: il dialic cence fin tra pierdite e vite”) e di “Le parole per dirlo: comunicare attorno all’esperienza di malattia” (“Lis peraulis par dîlu: comunicâ su la esperience di malatie”), doi incuintris che a vuelin evidenziâ cetant impuartant che al è, come educadôrs e adults, il savê stâ e il dialogâ cui fruts e cui fantats su cuistions fondamentâls de esistence, che a cheste i dan significât. Lis dôs seradis a son par cure de Associazion Oncologjiche Friûl de Alte ODV.

Par partecipâ ai incuintris, che a son gratuits, si à di notâsi mandant un messaç par WhatsApp o un sms a Gaia Pecile (335 1266621) o pûr scrivint une mail a gaia.pecile@asufc.sanita.fvg.it. I stes contats si puedin doprâ ancje par domandâ informazions o sclariments.

Il percors al è une des iniziativis de progjetazion locâl dal Servizi Sociâl dai Comuns “Tempo che nutre”, spazis e timps dedicâts a tignî cont di cui che al ten cont e di cui che al à voie di fâsi domandis e cirî rispuestis par educâ, e dal Program di puartade nazionâl P.I.P.P.I., che al vûl rispuindi ae dibisugne di ogni frut di cressi intun ambient stabil, sigûr, protetîf e “nutritîf”, fasint cuintri in maniere ative al nassi di situazions che a favorissin lis disparitâts sociâls.

La bielece e la maravee dal educâ, dal tirâ sù une vite zovine, a son intatis e si platin intal viaç, che in maniere inevitabile al met al mont ancje ogni adult che al eduche. L'invît al è chel di cjatâsi tra adults in cjamin par fevelâ di chest e provâ a fâ simpri miôr, cuntune dedizion particolâr al educâ cul cuarp, la ment, il cûr e il spirt in ecuilibri. Par sintîsi mancul di bessôi te inciertece, acetant la fragjilitât umane di ognidun, tornant a scuvierzi la ricjece di une comunitât che si ten cont. Insiemi.