Cliniche reumatologjiche: belanç dai prins 18 mês di ativitât dal ambulatori pe vacine cuintri dal Herpes Zoster par pazients fragjii.

Cui 16 di Març dal 2022, te Cliniche di Reumatologjie dal Ospedâl di Udin si à viert un ambulatori setemanâl pe vacine dai pazients cun malatiis imunoreumatologjichis che par vie de malatie e des terapiis immunosopressivis a son plui a risi di cjapâ l’herpes zoster.

In buine part, a son pazients cun malatiis autoimunis cronichis tant che la artrite reumatoide, o mancul frecuentis o raris, tant che il lupus, la sclerodermie o lis vasculitis, che par solit a vegnin tratadis cun medisinis che a sbassin il sisteme imunitari in maniere costante, come i steroits e i imunosopressôrs convenzionâi e biotecnologjics.

Il personâl medic, infermieristic e aministratîf de Cliniche e de Direzion Mediche si integre cul Dipartiment di Prevenzion par gjestî il percors, realizant duncje un model di sinergjie tra ospedâl e teritori.

Cheste iniziative e à rapresentât une novitât assolude tal ambit de ufierte vacinâl dal F-VJ e une des primis esperiencis su dut il teritori nazionâl. La prevenzion dal Zoster, che fin cumò e vignive fate tai Dipartiments di Prevenzion, e je vuê disponibile ancje tal Ospedâl, te Cliniche che e à za in cure i pazients imunoreumatologjics, semplificant cussì il percors pe vacine e creant continuitât tra la Medisine teritoriâl e l’Ospedâl. Chest al permet al pazient di confrontâsi in maniere direte cul specialist su la oportunitât di vacinâsi e su la tempistiche otimâl par fâlu, che e tegni cont des terapiis in cors o che si è daûr a scomençâ e des ativitâts di malatie dal singul pazient. Il rapuart di fiducie tra il pazient e il specialist ospedalîr al permet di veicolâ in maniere juste lis informazions su la protezion dal pazient fragjil, otimizant il mieç de vacine e creant un percors virtuôs tra ospedâl e teritori.

Tai prins 18 mês de ativitât, 110 pazients a àn completât dut il cicli vacinâl, che al à dôs dosis a 8 setemanis di distance une di chê altre, e altris vincj pazients a àn fate la prime dose. Si trate intal 80% dai câs di feminis cuntune etât medie di 65 agns, che cirche metât di lôr e à la artrite reumatoide e chê altre metât artopatiis inflamatoris cronichis e malatiis autoimunis sistemichis, come il lupus, la sindrome di Sjögren o la sclerodermie. Un dât une vore interessant al è chel relatîf ae grande prevalence di pazients, cirche il 50%, cun episodis pregrès di infezions di HZV; cheste popolazion e je plui a risi di cjapâ une altre infezion e di lâ incuintri a complicancis grâfs, tant che la neuropatie posterpetiche. Chest al evidenzie la urgjence di intervignî adore cu la prevenzion vacinâl tai pazients cun malatiis imunoreumatologjichis, za prin di scomençâ i trataments imunodepressîfs e tes primis fasis dopo de diagnosi.

Cheste ativitât di vacinazion/prevenzion e je stade associade ancje a un progjet di ricercje su la eficacie e la sigurece di cheste vacine te popolazion di pazients imunoreumatologjics, stant che a mancjin dâts specifics e che la cressite di interès de comunitât sientifiche rispiet ae imunizazion dai pazients imunodeprès e je costante. Ce che si à rilevat al è che la vacine e je stade tolerade une vore ben: i events contraris plui comuns, rilevats tal 50% dai câs, a jerin lizêrs e a jerin pal plui dolôr tal pont de punture o, mancul di frecuent, fierisele o cefalee, e da râr a àn vût bisugne di analgjesics. Dome un pazient al à presentât un event contrari che i à precludût di finî il cicli vacinâl. Dome 4 pazients a son lâts incuintri a une riativazion lizere de malatie di fonde; chest al confuarte su la sigurece de vacinazion e al conferme la impuartance di podê condividi cul specialist la gjestion de terapie di fonde. Par ultin, ma une vore impuartant, dome un pazient al à disvilupade une recidive de infezion erpetiche dopo de vacine, di entitât lizere e cence complicancis.

“Cheste e je la prime esperience nazionâl di vacinazion par Herpes Zoster de bande di une cliniche di Reumatologjie – al dîs il prof. Luca Quartuccio – Il belanç, a un an e mieç dal inviament dal servizi, al è une vore positîf, sedi in tiermins di partecipazion e di sodisfazion dai pazients, che a son supuartâts intune sielte impuartante pe salût, sedi in tiermins di sigurece e tolerabilitât de vacine. Al è un servizi dulà che i pazients a tornin a cjatâ il lôr personâl medic specialistic, infermieristic e aministratîf te gjestion de vacine. Si è regjistrade une grande sodisfazion ancje de bande de Midisine teritoriâl, dulà che si è slizerît il percors di protezion dal pazient fragjil. L’auguri al è chel di sensibilizâ ancjemò di plui i miedis di medisine gjenerâl, i miedis specialiscj e la popolazion par che ducj i pazients a savedin che a puedin beneficiâ di chest imprest di prevenzion impuartant e di podê slargjâ, in colaborazion cul Dipartiment di Prevenzion, la ufierte vacinâl dal nestri servizi tal futûr prossim.