Cliniche Gjinecologjiche di Udin: a son stâts tratâts i prins doi câs di eletrochemioterapie
vinars 20 di Zenâr dal 2023
Te Cliniche Gjinecologjiche di Udin, tai dîs passâts, a son stâts tratâts i prins doi câs di eletrochemioterapie par dôs pazientis che a àn vude une recidive di tumôr vulvâr, e che no puedin plui zovâsi di chei altris trataments che si fasin pal solit. Cheste tecniche e permet di slungjâ la sperance di vite e di ridusi une vore i sintoms dolorôs; in plui, e je buine pal tratament paliatîf dai tumôrs vulvârs che a son intune fase avanzade e/o recidîfs.
Il carcinome vulvâr al è une neoplasie rare, al rapresente il 4% tra ducj i tumôrs gjinecologjics, e il 0,3% tra lis neoplasiis femininis. Al è une malatie che si presente plui dispès tes pazientis anzianis (plui di 75 agns). La terapie e je influençade de etât e dispès e consist inte chirurgjie associade cu la radioterapie.
Cundut di cheste associazion di terapiis, cirche il 33% dai câs al fâs une recidive che e limite lis operazions terapeutichis seguitivis. In pazientis cun recidive, il tratament chirurgjic e/o radioterapic a son une vore limitâts e dispès no si puedin propit fâ. Soredut parcè che cheste tipologjie di tumôr si presente in feminis anzianis, che no puedin sopuartâ une chirurgjie une vore agressive. Cun di plui, al è impussibil ripeti la radioterapie se lis pazients a son za stadis sometudis a terapie radiante inte stesse zone dal cuarp, intant che la chemioterapie e zove pôc par chestis neoplasiis.
In chescj câs, i studis a àn dimostrât la eficacie e la semplicitât de aplicazion dal tratament cu la eletrochemioterapie che e permet un miorament evident de cualitât de vite des pazientis. La eletrochemioterapie si è mostrade buine di slungjâ lis prospetivis di vite e, soredut, di ridusi un grum la sintomatologjie; di fat e je une malatie une vore dolorose. La eletrochemioterapie e je une procedure inovative che e cumbine la eletroporazion reversibile cu la chemioterapie endovenose, doprant un dispositîf specific che al mande fûr impuls eletrics e che al ven metût a contat diret cul tumôr. La eletroporazion reversibile - o ben, l’aument provisori de permeabilitât de membrane des celulis tumorâls indot dal cjamp eletric - e amplifiche plui di 300 voltis il traspuart des moleculis dal farmac chemioterapic che, soministrât in vene, si concentre dentri dal tumôr otignint duncje une azion fate propit sul tiessût malât. In complès, o fevelìn di une procedure pôc invasive che no dure plui di 45 minûts o une ore, cuntune riprese imediade des pazientis.