"Cielo Rosso": la cjançon dai zovins di Udin nassude tal laboratori di songwriting cun Marco Anzovino

Martars ai 28 di Fevrâr al è finît il laboratori musicâl di songwriting, o ben di composizion, diret dal mestri Marco Anzovino tal IMFR Gervasutta, in presince dal personâl de Neuropsichiatrie de Infanzie e Adolessence  (NPIA), dai rapresentants de associazion ABIO (Associazione Bambino in Ospedale) e di un donadôr privât, che a àn sostignût la realizazion dal progjet. Cun di plui, a jerin presints pe Direzion ASUFC, la dotore Mara Pellizzari, diretore dal Distret di Udin, e il dotôr Massimo Di Giusto, Diretôr Sociosanitari.

Duncje, al è stât presentât il videoclip cul titul "Cielo Rosso", risultât dal lavôr fat tai mês di Zenâr e Fevrâr di une desene di fantats che a àn scrit e cjantât il test, acompagnâts intal percors dal musicoterapeute Anzovino, di une volontarie de ABIO e di doi educadôrs de NPIA.

Pai fantats al è stât un percors che ur à permetût di vivi une esperience di grup emozionante, di chês che si visisi, e di podê fâ un viaç dentri di se, intes propriis lidrîs emotivis, cuntun lavôr sinergjic, intun clime di colaborazion e di condivision.

Tra lis arts, la musiche e je chê che e influence cun plui profonditât ogni aspiet de nature umane. Il cuarp al gjolt dal ritmi, la melodie e stimole lis emozions, la armonie e la struture la part inteletive.

Si à ancje di calcolâ che la cjançon, jessint un lengaç universâl, e je un strument relazionâl e comunicatîf indispensabil, soredut pai zovins che a cjatin  inte fruizion musicâl une compensazion personâl e sociâl aes lôr emozions, aes lôr esperiencis.

"Lis cjançons a son balsamichis - al à declarât Anzovino - massime te adolessence: a slissin i cjantons che a fasin plui mâl, ti puartin inaltrò, ti fasin svolâ cu la fantasie fin al pont di fâti stâ miôr intai fats, inte realtât. Une cjançon e pues salvâti, tirâti sù in cierts moments de zornade, ti slungje la man, e rive a fâti cambiâ l'umôr. Il compit di ogni persone al è chel di esprimi la sô umanitât: i fantats, cjantant lis peraulis che a scrivin, a metin in vore chest compit, scuvierzint la lôr unicitât”.

In chest percors educatîf  terapeutic, i zovins a son passâts dal scoltâ la vôs dai lôr cjantants preferîts, a scuvierzi chê dai compagns, fin a fâ scoltâ la lôr stesse vôs, imparant a acetâsi e a acetâ chei altris, a mostrâsi par ce che si è.

A àn imparât a "lassâsi lâ" intal grup: a esprimisi cun chei altris intune esperience di cûr e di libertât, un mieç cussient e positîf pe lôr cressite e pal lôr disvilup di relazion. E je stade soredut une esperience di vite, di grup e di protagonisim positîf che al à fat vignî fûr lis lôr capacitâts, i lôr talents, i lôr sintiments, i lôr pinsîrs midiant dal lengaç de cjançon. A àn podût condividi dut chest cul mont esterni midiant di un videoclip, fat dai fantats cul videomaker Matteo Pavanello, che al emozione e che al cjape dentri cu la sô delicatece e unicitât.

E je stade une esperience che si fonde su valôrs che a son impuartants pe cressite di un adolessent tant che il divertiment san, la colaborazion, il vinci lis dificoltâts.

Un percors che no si fonde su la competizion, dulà che no tu âs di eliminâ nissun compagn par podê realizâ te stes, anzit, propit il jutori dal grup al miore la prestazion di ognidun.

La dotore Pellizzari e il dotôr Di Giusto, ancje a non de Direzion Gjenerâl e Sanitarie de Aziende, a àn puartât un ringraciament  sintût a ducj chei che a diviers titul, ancje tant che volontaris, a supuartin il percors di cressite dai zovins intai siei diviers aspiets.

Un ringraciament particolâr ae associazion ABIO che dal 2004 e colabore in maniere continue cu la NPIA, sedi a nivel teritoriâl che ospedalîr, poiant iniziativis pal benstâ dai fruts e dai fantats, a pro di diviers laboratoris dedicâts e midiant di donazions di materiâi ludics, tecnologjics, mobilie, cul supuart di donadôrs privâts e, di pôc timp incà, ancje de Associazion UdinAiuta.