Certificazion “platinum” di nivel european pe Stroke Unit dal Ospedâl di Udin

Al è rivât un impuartant ricognossiment pe Stroke Unit dal Ospedâl di Udin: di fat, la struture, che e fâs part dal Dipartiment Cjâf Cuel e Neurosiencis, direte dal dotôr Giovanni Merlino, e à ricevût il premi ESO Angels Award di nivel “Platinum” pal cuart trimestri dal 2023, pai timps des proceduris di ricanalizazion e pai pazients curâts. La Stroke Unit di Udin e ricovere ogni an plui o mancul 700 pazients che a àn patologjiis cerebrovascolârs, fasint cirche 150 proceduris di trombolisi e 100 trombectomiis mecanichis.

La iniziative “Angels” e à il patrocini de European Stroke Organization (ESO) e de Italian Stroke Association-Associazione Italiana Ictus (ISA-AII); il so obietîf al è chel di promovi intal mont la culture che l’ictus al è une patologjie che e dipent dal timp, sensibilizâ cun progjets su cheste tematiche, fâur fâ pratiche ai miedis e ai infermîrs, controlâ e miorâ la cure dal ictus ischemic che e cjape dentri plui dissiplinis.

Chest percors al tache cu la emergjence de trombolisi venose e cu la trombectomie mecaniche, se a coventin, dopo al va indevant cul ricovar tal ospedâl, lis curis di prevenzion secondarie, il studi dai fatôrs di risi e la riabilitazion.

Cheste iniziative internazionâl e cjape dentri plui di 8000 ospedâi in dut il mont: duncje, e vûl meti adun une comunitât globâl di ospedâi e di professioniscj che a lavorin ogni dì par miorâ la cualitât des curis dai pazients cun ictus, fevelant tra di lôr par rivâ a obietîfs comuns. Si partecipe al progjet Angels Award controlant in maniere periodiche i percors di diagnosi e di cure dai pazients cun malatiis cerebrovascolârs: cussì si contribuìs a valutâ e a condividi, e si confrontisi cul rest de comunitât par capî ce nivei di eficience che si àn.

Par miorâ simpri di plui lis curis, al è fondamentâl misurâsi e confrontâsi in maniere continue; tai paîs industrializâts l’ictus al è la prime cause di invaliditât permanente, duncje, une buine cure e je fondamentâl par garantî al pazient une miôr prognosi e ancje par ridusi l’impat sociâl e economic de malatie.

Stant che e je une patologjie che e dipent dal timp, la iniziative si concentre massime sui risultâts de performance misurant il timp che al passe tra i prins segnâi de malatie, il rivâ tal ospedâl, l’inizi dal percors di diagnosi, l’inizi des curis (trombolisi/trombectomie), il ricovar te Stroke Unit e, par ultin, lis indicazions terapeutichis che si dan te dimission e la disabilitât di 3 mês. Chest, par miorâ simpri di plui i timps e la eficience, sedi prime di jentrâ tal ospedâl, che cuant che si è dentri.

Il dotôr Giovanni Merlino: “O sin braurôs di chest ricognossiment internazionâl che al conferme la validitât dal percors fat de ASUFC e la cualitât dal lavôr dal grup multidissiplinâr che al è impegnât tal curâ cheste malatie: al è un premi che nus incoragje a mantignî chescj alts nivei di assistence che a sigurin ai pazients il miôr percors clinic e assistenziâl pussibil.”