Inizi de campagne di vacinazion antiinfluençâl

La vacinazion antiinfluençâl e je fondamentâl par prevignî la influence stagjonâl e lis sôs complicancis, in particolâr tes categoriis plui vulnerabilis.

Ai 14 di Otubar e scomence la campagne di vacinazion antiinfluençâl. La vacine antiinfluençâl e je un dai imprescj che a judin di plui a prevignî la influence e lis sôs complicancis, soredut tes categoriis plui vulnerabilis (in particolâr anzians, frutins, personis cun malatiis cronichis o cuntun sisteme imunitari comprometût).

La vacinazion antiinfluençâl e je racomandade e sore nuie par feminis in gravidance, fruts e frutins tra i 6 mês e i 6 agns, personis cun 60 o plui agns, pazients fragjii, familiârs e contats (adults e fruts) di personis cuntun risi alt di complicancis, donadôrs di sanc e lavoradôrs che a riscjin di cjapâ la infezion. 

Par vacinâsi si pues indreçâsi:

• al propri Miedi di medisine gjenerâl e Pediatre di libare sielte
• tai Centris vacinâi aziendâi, imbinât cu la vacine anti COVID 
• tes Farmaciis che a aderissin (dome se si è maiôrs di etât e no je la prime volte che si fâs une vacinazion antiinfluençâl)

Ce ise la influence?

La influence e je une malatie respiratorie causade di un virus. Si trasmet tal aiar midiant des gotutis di salive che une persone infete e emet fevelant, starnudant e tossint. Chestis gotutis a puedin jentrâ tal nâs des personis dongje o poiâsi su lis superficiis, dulà che il virus al pues jessi trasferît des mans al nâs, ae bocje o ai voi. 

Ogni an la influence e tocje milions di personis, ma è pues jessi pericolose in particolâr pai anzians, i frutins, lis personis cun malatiis cronichis e chês che a àn un sisteme imunitari comprometût.

Vacinâsi cuintri de influence al jude a ridusi la pussibilitât di cjapâle, a limitâ la difusion dal virus e a protezi se stes e lis personis plui fragjilis de comunitât. In particolâr, la vacinazion e je utile par prevignî complicancis gravis tant che la polmonite.