Il benstâ de persone: doi incuintris par assistents familiârs e badants
miercus 22 di Novembar dal 2023
Inmaneâts dal Servizi Sociâl dai Comuns ai 22 e ai 29 di Novembar a Glemone
Par cure dal Servizi Sociâl dai Comuns dal Ambit teritoriâl dal Glemonàs e dal Cjanâl dal Fier e Valcjanâl, al sta par tacâ un gnûf cicli formatîf indreçât aes assistentis familiârs che a assistin a cjase e che a supuartin, in variis formis, personis no autosuficientis: anzians cun autonomie une vore comprometude, viodûts di assistentis familiârs che dispès a son forestis, e adults in cundizion di disabilitât grave che a àn bisugne di personâl pal sostegn ae vite indipendente, ae emancipazion e al inseriment sociâl.
Cun chescj events informatîfs, formatîfs e di laboratori, nassûts te suaze de normative sul Fonts pe Autonomie Pussibile e pe assistence a tiermin lunc (FAP), si à chê di sostignî il lavôr di cure, incressi lis cognossincis necessariis par sigurâ cualitât te assistence, favorî une buine relazion tra assistentis familiârs, assistûts e i lôr cjârs, e ancje promovi ocasions di socializazion e di agregazion pes assistentis soredut se forestis e cu lis fameis lontanis.
La propueste formative di chest an e tocje il teme dal benstâ de persone e e sarà gjestide di doi operadôrs impegnâts tal Servizi sociâl dai Comuns: la dotoresse Alice Scalera, psicolighe de Cooperative Sociâl Itaca, e fevelarà de gjestion dal stress, dant strategjiis utilis par frontâ lis dificoltâts peadis ae vite di ogni dì e al lavôr di cure, intant che l’educadôr dal Servizi sociâl, Roberto Foglietta, al proponarà ativitâts di grup par stâ ben cun chei altris, doprant la musiche, la vôs e il lengaç dal cuarp.
Cheste ativitât e previôt un numar massim di partecipants di 25 di lôr e par chest e je necessarie la iscrizion dentri di miercus ai 22 di Novembar telefonant ai numars scrits ca sot; in câs di sorenumar al sarà programât un incuintri sucessîf.
I apontaments a son par:
Miercus ai 22 e ai 29 di Novembar dal 2023, des 2.00 aes 4.00 dopomisdì
li de “Sale Lodolo” dal Presidi Ospedalîr pe Salût di Glemone, Plaçâl Rodolone – jentrade degjencis.
La iniziative e je sore nuie e e je vierte ancje a altris assistents (familiârs, operadôrs, volontaris) e ai citadins interessâts ai argoments tratâts.
A domande al vignarà consegnât un atestât di partecipazion.
Par informazions:
Daniela De Narda, Coordenadore de Aree Adults-Anzians dal Servizi sociâl dai Comuns – 0432 989542
Alice Scalera – 389 0986292 – e-mail: a.scalera@lavorosociale.eu