Ambulatori specialistic pes gravidancis multiplis: un percors gnûf dedicât intal repart di Ostetricie-Gjinecologjie dal Sante Marie de Misericordie
miercus 12 di Fevrâr dal 2025
Dal mês di Fevrâr dal 2025 par dutis lis feminis che a spietin plui di un frut al sarà atîf te Struture di Ostetricie e Gjinecologjie dal presidi ospedalîr Sante Marie de Misericordie di Udin un ambulatori dedicât e specializât inte gravidance multiple.
L'obietîf al è chel di uniformâ la assistence aes pazientis cun gravidance multiple, prime, dilunc e dopo dal part.
Il fin al è chel di garantî un miorament des curis e dai lôr risultâts, midiant di un ambulatori dedicât e di proceduris clinichis e di management de direzion inte Aziende Sanitarie Universitarie Friûl Centrâl uniformis.
Tal ambulatori al sarà disponibil un grup multidissiplinâr che al cjape dentri un gjinecolic ostetric, une ostetriche, un neonatolic, un psicolic, figuris professionâls specifichis par podê furnî aes feminis un acompagnament a 360 grâts dilunc di dute la lôr gravidance.
In principi al sarà operatîf ogni dôs setemanis, il lunis di matine, te Aree ambulatoriâl dal paveon 7, intai ambulatoris di Ostetricie e Gjinecologjie. Dilunc des visitis si fasarà sedi il control ostetric de gravidance par verificâ il benstâ de mari, sedi une ecografie di secont nivel par valutâ il benstâ dai zimui.
Par prenotâ lis visitis tal ambulatori de gravidance multiple si à di telefonâ ae Segretarie Ambulatoriâl (telefon 0432559695, des 8.00 aes 13.30). La impegnative e vignarà mandade fûr cun esenzion M50 (sicu gravidance di zimui) e e podarà cjapâ dentri:
Visite ostetriche + ecografie ostetriche (pe 1e visite);
Control ostetric + ecografie ostetriche (pes visitis seguitivis);
Ecografie “translucence nucâl” (se al sarà pussibil, si le fasarà in chel stes ambulatori, se di no, intal ambulatori specific)
Ecografie morfologjiche e premorfologjiche se indicât (se al sarà pussibil, si le fasarà in chel stes ambulatori, se di no, intal ambulatori des ecografiis morfologjichis/II nivel) molteplicitât 2
Il Diretôr Medic dal Sante Marie de Misericordie, dotôr Domenico Montemurro: “In graciis de professore Driul e de disponibilitât di diviersis figuris professionâls, o vierzìn chest gnûf ambulatori che al ufrìs une assistence ancjemò plui specializade pes futuris mamis che a varan la gjonde di meti al mont frutins zimui: e je une iniziative che e à un percors dedicât cul fin di garantî il ben des pazientis e dai nassints”.