La Associazion Volontaris di Solidarietât (AVOS) a flanc dai pazients dializâts di Cividât

Tal Otubar dal 2022, te Dialisi di Cividât, che e fâs part de struture di Nefrologjie, Dialisi e Traplant renâl direte dal dotôr Giuliano Boscutti, si son fats cambiaments logjistics che a à mudât cierts percors che i pazients cronics a jerin usâts a fâ.

A son plui o mancul 50 pazients dividûts in 4 turnis di dialisi e ogni turni di dialisi al è une piçule comunitât: a son pazients cronics che a àn dispès capacitâts motoriis comprometudis, simpri cuntune autonomie limitade e pe plui part anzians.

Si indrecin ae struture trê voltis par setemane par fâ la sentade di dialisi che e dure plui o mancul 4 oris e tancj di lôr a son traspuartâts in carocine o a àn bisugne di presidis par cjaminâ.

In chest contest, la struture e à podût poiâsi sui volontaris di AVOS (Associazion Volontaris di Solidarietât) che si son doprâts par facilitâ il traspuart intal percors gnûf e slizerî duncje la sentade. Chest al à fat nassi une rêt di relazions che, di là de soluzion pe dibisugne manifestade, al à insiorât sul plan uman tant i pazients che i volontaris in maniere vicendevule.

Martars ai 14 di Març, il dotôr Boscutti al à cjatât, adun cul responsabil infermieristic dal Centri Dialisi Antonio De Toni, il grup di volontaris AVOS impegnâts par ringraciâju de lôr opare e rinfuarçâ il leam cu la struture, in plui di vê lis lôr indicazions par puartâ indenant inmò miôr la ativitât impuestade.

“Cheste situazion e je un esempli impuartant di cemût che la opare dal volontariât e pues judâ une vore lis struturis sanitariis e dâ solêf ai pazients risolvint almancul in part problemis che a puedin someâ piçui, ma che a son aspiets impuartants de cualitât di vite dal malât cronic – al aferme il stes dotôr Boscutti –. Cun di plui, il confront cun chestis realtâts al è fondamentâl parcè che nus permet di capî, tal concret, dulà che o podìn miorâ la organizazion atuâl. Ae Associazion e a dute la rêt di volontaris al va il gno ringraciament sclet e profont”.