"L'ABC des emozions": laboratoris di alfabetizazion emotive par gjenitôrs

Cemût si sintìno cuant che i nestris fîs si inrabiin, a somein spaventâts o pûr a son euforics? Ce fasìno se la situazion nus pâr dificile di gjestî? Ducj i gjenitôrs che si fasin chestis domandis a podaran confrontâsi su chestis tematichis e no dome tai laboratoris «L’ABC delle emozioni» inmaneâts par promovi il savê stâ tal cjamp dealfabetizazion emotive.

La alfabetizazion emotive e je unprocès di aprendiment costant che al smire a disvilupâ lis capacitâts di ricognossi, capî, pandi e gjestî lis nestris emozions e di ricognossi e capî chês di chei altris in maniere cussiente e funzionâl aes situazions de vite. Cheste competence e puarte in miôr il benstâ psicologjic, al ridûs la frustrazion, al infuartìs la autostime e la empatie.

I laboratoris, in program a Glemone e a Scluse tra i 2 di Otubar e i 20 di Novembar dal 2025, a son dividûts in cuatri incuintris di une ore e cuindîs minûts ognidun. A son utii soredut pai adults che a vuelin svicinâsi al teme des emozions te relazion cui lôr fîs. A saran vuidâts di une psicolighe psicoterapeute de Cooperative Aracon, judade di educadoris dal Servizi sociâl.

I apontaments – che si fasaran des 17.30 aes 18.45 a Glemone, te Sale riunions dal Servizi sociâl dai Comuns, joibe ai 2, 16 e 30 di Otubar e joibe ai 13 di Novembar e a Scluse, tal Teatri comunâl «Pierluigi Cappello», joibe ai 9 e 23 di Otubar e joibe ai 6 e 20 di Novembar – a judaran i partecipants a osservâ il lengaç dal cuarp, a dâ un non aes emozions e a descrivilis, a scoltâlis e a "validâlis" cence judicâlis buinis o tristis, slargjant in cheste maniere il propri patrimoni emotîf.

I laboratoris, gratuits, a favorissaran la creazion di un clime seren e divertent, che al stimolarà la partecipazion ative di ducj e al judarà a disvilupâ relazions positivis. Par facilitâ la presince dai gjenitôrs, al sarà a disposizion un spazi di animazion e zûc par fruts fin a 10 agns.

Cui che al è interessât al varà di mandâ un messaç WhatsApp al numar 342 5149093 par confermâ la sô partecipazion.

I laboratoris a son promovûts dal Servizi Sociâl dai Comuns dal ambit teritoriâl dal Glemonàs e dal Cjanâl dal Fier - Valcjanâl e realizâts adun cu la Cooperative sociâl Aracon, che e aderìs ae Associazion Temporanie di Imprese «Cooperative Itaca - Universiis - CODESS FVG - Aracon». Cheste Associazion e à vinçût l'apalt intitulât «Servizi finalizât ae gjestion di intervents, servizis e progjets pes personis e pes comunitâts», che la Aziende sanitarie universitarie Friûl Centrâl, ent gjestôr dal Servizi sociâl dai Comuns, i à afidât. I apontaments di Scluse a son realizâts in colaborazion cul Comun di Scluse che al met a disposizion lis sôs struturis par dâ acet aes fameis.

Par informazions:

• Servizi sociâl dai Comuns 3479517745
• Cooperative Aracon 3425149093