Alessandro Crestani gnûf diretôr de Urologjie di Udin
lunis 17 di Lui dal 2023
L’Ospedâl di Udin al à un gnûf Diretôr de Urologjie: la Direzion ASUFC e à dât l’incaric al dot. Alessandro Crestani, che al à cjapât servizi ai 16 di Jugn stâts.
43 agns, origjinari di Bassano del Grappa, si è laureât ae Universitât di Ferare e specializât te Universitât di Padue: la ultime esperience e je tal Istitût Oncologjic Venit IRCCS di Padue cun sede a Castelfranco Veneto.
Specializât tal setôr de chirurgjie urologjiche oncologjiche e de chirurgjie mini invasive laparoscopiche e robotiche cun formazions dedicadis in diviers istitûts europeans, al svante une esperience particolâr in cjamps specialistics de chirurgjie robotiche, tant che l’intervent di asportazion e ricostruzion de vissie (intervent fat dut cun strumentazion robotiche); chirurgjie prostatiche e chirurgjie conservative dal rognon.
“O soi braurôs di tacâ cheste gnove esperience tant che Diretôr intun Ospedâl impuartant come il Santa Maria della Misericordia: o puarti la mê esperience soredut tal cjamp de chirurgjie oncologjiche robotiche, che aromai e cuvierç la cuasi totalitât dai intervents urologjics, par rinfuarçâ lis competencis de equipe e puartâ indenant progjets gnûfs tant che la chirurgjie cul laser cul olmi par tratâ la ipertrofie prostatiche buine midiant de enucleazion transuretrâl”.
Component dal Grup AGILE (che al cjape dentri i plui grancj esperts di urologjie laparosopiche e robotiche), de Societât Taliane di Urologjie (SIU) e editôr associât pe impuartante riviste di setôr Minerva Urologica e Nefrologica, il dot. Crestani al è a cjâf de struture che e à une equipe componude pal moment ancje de dotore Abbinante, il dot. Collavino, il dot. De Giorgi, il dot. Franzese, il dot. Giannarini, la dotore Kungulli e la dotore Sekulovic.
Esperience particolâr tal cjamp sientific pal dot. Giannarini, president dal Gruppo Uro-Oncologico dal Nord Est (GUONE), e pai professioniscj dot. De Giorgi e dotore Abbinante pal tratament de calcolosi urinarie cun metodologjie percutanie e mini invasive.
Il dot. Caporale, diretôr gjenerâl de ASUFC: “O din il benvignût al dot. Crestani, che al va a completâ un altri tassel fondamentâl te opare impuartante di riorganizazion che ASUFC e sta frontant sedi pal ospedâl Hub dal Santa Maria della Misericordia sedi pai Ospedâi spoke intal teritori aziendâl”.
L’incaric de Direzion aziendâl al dure cinc agns.