"Jessi gjenitôrs di un adolessent. La distance juste"
lunis 28 di Avrîl dal 2025
A van indenant lis ativitâts dai Grups cun gjenitôrs inmaneadis dal Servizi sociâl dai Comuns dal ambit teritoriâl dal Glemonàs e dal Cjanâl dal Fier - Valcjanâl, gjestît de Aziende sanitarie universitarie dal Friûl di Mieç. E je daûr a tacâ la schirie di incuintris «Jessi gjenitôrs di un adolessent. La distance juste» indreçât ai gjenitôrs dai zovins che a frecuentin lis Scuelis Secondariis di secont grât.
I incuintris si fasaran sot de direzion di Amanda Dreossi, psicolighe psicoterapeute de Cooperative Sociâl Aracon che e lavore su incarghe dal Servizi sociâl midiant di un apalt di servizi pes personis e pe comunitât afidât ae Associazion Temporanie di Imprese «Cooperative Itaca – Universiis – CODESS FVG – Aracon»; i incuintris a àn l'obietîf di ufrî ai adults un spazi di condivision par rifleti sul percors che al puarte i adolessents a separâsi de famee di origjin par cjatâ la lôr identitât.
I apontaments a saran: lunis ai 5, 12 e 19 di Mai dal 2025 des 17.30 aes 19.00 a Glemone, te Sale riunions dal Servizi sociâl dai Comuns, in Plaçute Baldissera, 2.
Si consee la iscrizion dentri di vinars ai 2 di Mai dal 2025 mandant un messaç WhatsApp al numar 3425149093 (Cooperativa Aracon).
La iniziative e je promovude inte suaze dal Program di Intervent pe Prevenzion de Istituzionalizazion (P.I.P.P.I.), cofinanziât dal Ministeri dal Lavôr e des Politichis Sociâls e de Universitât di Padue, cul obietîf di «gjenerâ gnovis pratichis preventivis» par «rispuindi ae dibisugne di ogni frut e fantat di cressi intun ambient stabil, sigûr, protetîf e “nutritîf”». Il Program al met in rêt lis Regjons, i Ambits Teritoriâi Sociâi, la Sanitât, i Servizis pe Infanzie, lis Scuelis, i Ents dal Tierç Setôr che a vuelin impegnâsi, in misuris diferentis, par «incressi la sigurece dai fruts e puartâ in miôr la cualitât dal lôr disvilup» rinfuarçant la responsivitât dai gjenitôrs, daûr di ce che al aferme il Nurturing Care Framework for Early Childhood Development (NFC), un document che al definìs la gjenitorialitât responsive tant che une modalitât dal adult atente ai segnâi e ai compits evolutîfs dal frut, sensibile e fondade sul scambi empatic e sul incoragjament (Alushaj et al., 2021; World Health Organization et al., 2018).
Par informazions:
Servizi sociâl dai Comuns 0432 989520