Istât 2026: di Dartigne a Tarvis laboratoris par fruts, fantats e zovins
Relazions, zûc e moviment, creativitât e lengaçs espressîfs, ma ancje ricicli, riûs e solidarietât intergjenerazionâl a caraterizin la ufierte di chest an
Il Servizi Sociâl dai Comuns dal ambit teritoriâl dal Glemonàs e dal Cjanâl dal Fier-Valcjanâl al propon une grande varietât di laboratoris estîfs pai fruts, fantats e zovins dal teritori.
Dutis lis iniziativis a àn chê di promovi relazions positivis tra i partecipants, judant a vierzisi a chei altris e a dialogâ intun ambient che al favorissi la scolte e la condivision, stiçant la colaborazion fra pârs e la partecipazion ative.
Cualchi propueste – i laboratoris «Tuttinsieme» (3-6 agns, 6-10 agns o 3-10 agns) e «Fuoriclasse» (11-14 agns) – e sarà dedicade a ativitâts in cercli, zûcs di grup, zûcs di moviment, zûc libar, ativitâts espressivis e creativis cun sperimentazion di tecnichis e materiâi diferents, confermant une modalitât che e je stade une vore preseade dai fruts, dai fantats e des fameis tes edizions passadis.
Lis zornadis di grancj zûcs «Let’s play together» (6-14 agns) a proponaran ai partecipants, in plui dai zûcs di grup e di moviment, zûcs di aghe e disfidis ae ultime ridade tal segn de amicizie e dal divertiment.
Tal laboratori «Tuttinsieme Emozioni» (3-6 agns) i fruts a zuiaran par scuvierzi rabie, avilizion, contentece e pôre, par condividi storiis e divertîsi insiemi, e tal stes timp svilupâ la capacitât di scoltâ e la creativitât.
I laboratoris par adolessents a tachin dai 14 agns e a proponin diviers lengaçs espressîfs: la musiche, par imparâ a scrivi cjançons, regjistrâ vôs e struments, ideâ i suns par films e videozûcs e doprâ sintetizadôrs professionâi, passant de idee sul telefon ae publicazion su Spotify; il lengaç dai podcast, par imparâ a scrivi, regjistrâ e publicâ un podcast professionâl intune vere redazion audio, tra microfons, storytelling, editing e branding, lavorant intune scuadre come intune vere produzion radiofoniche; il teatri par divertîsi cui compagns, par scuvierzi i talents personâi e imparâ a frontâ i limits interiôrs, intun spazi di ricercje personâl e di creazion artistiche condividude.
Al è in program ancje un laboratori di riûs e di ricicli, fat in colaborazion cul Centri dal riûs «Maistrassâ» di Glemone, che al acompagnarà i partecipants a scuvierzi «la anime platade» dai ogjets che a prin viodi al somee che a vedin finît il lôr compit ma che, cu la ispirazion juste e un tic di inzen, a puedin deventâ oparis mestris di design.
Un laboratori al sarà dedicât al incuintri tra gjenerazions: i zovins a cognossaran i anzians dal Grup di socializazion di Vençon e dopo a progjetaran e a metaran in vore ativitâts di animazion par «insegnâ il propri presint e imparâ il lôr passât», cul metisi in zûc.
Dutis lis ativitâts a son sore nuie e a saran metudis in vore dai operadôrs de Cooperative sociâl Aracon (che e aderìs ae Associazion Temporanie di Imprese «Itaca – Universiis – Codess Fvg – Aracon»), supuartâts in cualchi laboratori di altris operadôrs, di formadôrs e di esperts.
Si metin in zonte i volantins des ativitâts singulis e doi volantins riepilogatîfs di ducj i laboratoris par fruts di 3 a 10 agns e par fantats e zovins dai 11 agns insù che si fasaran vie pal Istât.
Par informazions: Servizi sociâl dai Comuns dal Glemonàs e dal Cjanâl dal Fier-Valcjanâl (0432 989520 - 3479517745).
Ca sot lis locandinis di ognidun dai laboratoris.