Servizi Sociâl dai Comuns de Cjargne: scree de mostre "Un Nadâl di Comunitât"

"Un Nadâl di Comunitât" al devente une mostre che e insiorarà lis viis di Tumieç e lis vetrinis dal "Centri pes fameis" di vie Matteotti 5/1.

La scree de mostre e sarà vinars ai 20 di Dicembar aes 15:30 e si podarà visitâle ancje ai 27 e ai 30 di Dicembar e ai 2 e ai 3 di Zenâr, des 14:00 aes 18:00.

La mostre "Un Nadâl di Comunitât" e je il risultât de iniziative cul stes non promovude 5 agns indaûr dal Servizi Sociâl de Cjargne cu la colaborazion de cooperative Itaca: in chê ocasion, i animadôrs a vevin proponût ai utents dal servizi, aes fameis e aes classis des scuelis, di realizâ une decorazion di Nadâl cu la forme di "gugjet", il simbul de tradizion cjargnele.

Stant che za inte prime edizion e veve partecipât tante int, i operadôrs sociâi a àn continuât a organizâle ancje intai agns dopo. "I simbui - a sclarissin i animadôrs dal Servizi Sociâl - a son stâts ogni an diferents, ma simpri peâts aes tradizions o al lûc là che si vîf: si è lâts indenant cul peç, che al veve chê di rapresentâ i nestris boscs cuntun pinsîr ancje a ce che al è sucedût intal 2018 cul burlaç Vaia, il taîr tant che un ogjet di condivision dal mangjâ in ogni famee cjargnele, e la stele alpine tant che simbul de mont, par rivâ al 2024 cul scarpet, par dâur lustri a dutis lis feminis cjargnelis e ae lôr abilitât intal passât".

Vie pai agns, a son stadis tantis lis personis che a àn partecipât. Vuê, di fat, il Servizi Sociâl, al à tirât dongje passe 200 lavôrs fats di cui che al à cjapât part: tancj di chescj materiâi a son presints tai videos publicâts sul sît de Aziende Sanitarie Universitarie dal Friûl Centrâl, ma pal Nadâl di chest an si podaran viodi ancje tes vetrinis dal "Centri pes fameis" de Cjargne, in vie Matteotti.

In plui de mostre, sui schermis dai tablets che a fasin part de esposizion si podaran viodi ancje altris fotografiis des decorazions che la comunitât cjargnele e à realizât. Cu la mostre "Un Nadâl di Comunitât", li dal "Centri pes fameis" al sarà ancje un presepi fat inte suaze dal progjet "Animazion in rêt":

"La prime part dal presepi - a spieghin i animadôrs - e conte de storie des feminis cjargnelis che a lavin a vore sù pes monts e intai prâts, e intant che a cjaminavin, a gucjavin, parcè che "no si sta cun las mans in man!"
Il fier che al vignive doprât di mancul si lu meteve intal "gugjet" par che lis feminis no si sbusassin.  

L’ambient al è chel tipic de nestre zone: lant indenant si cjatin i oms che a lavoravin il len intai boscs cun cetante fuarce e volontât. Po, la atenzion e va su chei cuntune stele alpine fra lis mans, che a van bande la cjase là che a son feminis e fruts. La stele alpine e jere un regâl pes lôr feminis. O cjatìn ancje une femine che e fâs la polente par ducj e che po le poie sul taîr. Cheste e je la cjase là che al nas Jesù cu la Madone e Josef.