Alpinisim pai zovins tal Cjanâl di Incjaroi: une gnove aventure pal Istât 2024 a Paulâr

Ai 18 di Jugn e je tacade la 3e edizion dal progjet “Alpinismo giovanile in Val d’Incarojo”, a Paulâr, paîs che al fâs part dal Bergsteigerdörfer, il circuit dai vilaçs dai alpiniscj, unic tal Friûl-Vignesie Julie. Al è un centri estîf par zovins e zovinis preadolessents, tra i 11 e i 14 agns dal Comun di Paulâr, intun percors dedicât a cognossi e a praticâ l’ambient de mont.
La iniziative e je nassude di une idee dal conseîr comunâl Annino Unida de Aministrazion comunâl di Paulâr, midiant di fonts par progjets des Areis Internis e cu la colaborazion de Aministrazion de sezion locâl dal CAI, dal Servizi Sociâl dai Comuns dal Ambit Teritoriâl de Cjargne – ASUFC, de Cooperative Itaca e de Associazion “Amici della Montagna”.

Il progjet si è caraterizât ogni an pe esplorazion ative dal ambient de mont che si pee cu la formazion sul ûs des gnovis tecnologjiis di doprâ cuant che si fasin escursions: chest, par promovi la mont tant che un lûc che al da benstâ, sedi tai aspiets naturalistics che culturâi.

Chest an, midiant ativitâts di game design, i zovins che a parteciparan a pensaran e a fasaran un zûc di taule su la fate dal “Risiko” e un depliant sul teme “La Grande Guerra nel territorio paularino”. No mancjaran lis gjitis sui trois, par scuvierzi il teritori acompagnâts di vuidis espertis.

Martars ai 18 di Jugn cu la prime escursion si à netât il troi dedicât al Alpinisim pai zovins, che al jere stât fat propit dal grup di zovins tal progjet estîf dal 2022.

Joibe ai 20 di Jugn si fasarà il prin laboratori dedicât ai zûcs di taule e si tacarà a progjetâ il zûc di taule su la grande vuere tal teritori di Paulâr, adun cui educadôrs de Cooperativa Itaca, Silvia Forgiarini e Manuel Guariniello, li des Scuelis di Paulâr dal Istitût Comprensîf Linussio-Matiz, simpri disponibil e pront a colaborâ.

Martars ai 25 e Miercus ai 26 di Jugn si fasarà une escursion fermantsi a durmî te Malghe Zermula.

In cheste jessude di doi dîs i zovins a saran acompagnâts dai volontaris dal CAI, dal Soccorso Alpino, dai Amici della Montagna di Paulâr, dai educadôrs de Cooperativa Itaca e di esperts che ur fasaran scuvierzi il teritori. 

Lunis il 1n e miercus ai 3 di Lui si fasaran i ultins laboratoris, simpri tes scuelis di Paulâr, cui educadôrs de Cooperative Itaca: i zovins a impararan a doprâ la app Copilot par fâ dopo imagjins e mapis su la fonde des informazions leadis ae grande vuere e al teritori, ducj contignûts studiâts cun atenzion par meti adun il zûc.

Lunis ai 8 e martars ai 9 di Lui si fasarà une escursion là che si passarà la gnot in tende, acompagnâts dai volontaris dal CAI de sezion di Ravasclêt, dal Soccorso Alpino, dai Amici della Montagna di Paulâr, de Protezion civîl e di esperts.

Il progjet al à trê obietîfs: scuvierzi e valorizâ il teritori pai zovins e cui zovins; fâur fâ une esperience di grup dulà che a vivin la mont e a metin adun un progjet creatîf e divertent che ur mostri cetant impat che e à vût la Storie su chescj puescj; a podaran cussì rifleti su la impuartance de responsabilitât individuâl e coletive pal ben comun e pe costruzion di un mont di pâs; fâur fâ la esperience de colaborazion cui grancj e cun ents publics e associazions di volontariât: chest lôr metisi a disposizion dai zovins al dimostre che dome cu la colaborazion une comunitât locâl e pues cressi.