Setemane de Imunizazion 2025: protezi insiemi, vuê e doman
lunis 28 di Avrîl dal 2025
La Organizazion Mondiâl de Sanitât (OMS) e celebre dai 24 ai 30 di Avrîl la Setemane mondiâl de Imunizazion 2025, cul slogan "La vacinazion par ducj e je tes pussibilitâts umanis", cul obietîf di sensibilizâ la opinion publiche su la impuartance de vacine pe salût individuâl e coletive.
Ancje la ASUFC, midiant dal Dipartiment di Prevenzion, e partecipe in maniere ative a cheste iniziative, marcant il valôr des vacinis tant che imprest fondamentâl di prevenzion des malatiis infetivis che a podaressin jessi gravis o mortâls.
Cemût che e evidenzie la Organizazion Mondiâl de Sanitât, al è impuartant promovi il podê di salvâ la vite che a àn lis vacinis parcè che
"Lis vacinis a son une des concuistis plui grandis de umanitât. Dal 1974 indenant a àn salvât 154 milions di vitis, ven a stâi plui di 3 milions vitis ad an, vâl a dî sîs personis al minût par cincuante agns. Inte stesse dade di timp, la vacinazion e à ridusût la mortalitât infantîl dal 40%: a pet di cualsisedi altri moment de storie, al è in dì di vuê che o vin il numar plui alt di fruts che a rivin a vivi fin al lôr prin complean e oltri. La vacine cuintri dal varuscli e rapresente di bessole il 60% di chestis vitis salvadis.
Midiant de vacinazion plui resintis cuintri de malarie, HPV, colere, dengue, meningjite, virus respiratori sinciziâl, Ebola, MPox, vuê si salvin plui vitis, di cualsisedi etât: chest al testemonee che o sin intune ete di progrès sientifics pardabon impuartants par ce che al inten il disvilup e la soministrazion des vacinis".
La vacine par "Protezi insiemi, vuê e doman" e rapresente un invît a rifleti sul rûl che ognidun di noaltris al à intal promovi la salût publiche.
"Insiemi" parcè che vacinâsi al vûl dî protezi se stes, ma ancje tutelâ lis personis plui fragjilis de comunitât: fruts masse piçui par jessi vacinâts, anzians, personis cun imunodeficiencis o cun patologjiis cronichis.
"Vuê" al riclame la urgjence de azion: la popolazion e à di jessi vacinade il plui pussibil par che no vedin di tornâ fûr chês malatiis che cumò a son za sot control.
"Doman" al cjale al avignî: invistî inte prevenzion al vûl dî costruî une societât plui sane, plui resiliente e plui pronte a frontâ gnovis sfidis sanitariis.
Si è ricognossût il valôr sociâl des vacinis, sedi pai beneficis su la salût che pe cressite economiche dal Paîs, oltri che pe riduzion de puaretât.
Duncje, cheste setemane e je la ocasion par:
- Crodi cun plui convinzion intes vacinis midiant di une informazion clare basade su dimostrazions sientifichis;
- Confermâ l'impegn des istituzions sanitariis par che ducj a puedin acedi ae vacinazion;
- Cjapâ dentri in maniere ative i citadins, lis fameis e lis comunitâts inte promozion di compuartaments responsabii e cussients.
Vacinâsi al è une azion di responsabilitât, di solidarietât e di cure par se stes e par chei altris.
Par vê plui informazions sui programs vacinâi ufierts de Regjon ai fruts, adolessents, anzians, viazadôrs, feminis in etât fertile e in gravidance, personis fragjilis cun patologjiis cronichis o altris categoriis a risi, si pues viodi il sît dedicât de Regjon F-VJ
Promozion Salût - Regjon F-VJ [pdf - 4,36 MB] (il link al vierç une gnove barconete)
https://www.regione.fvg.it/rafvg/cms/RAFVG/salute-sociale/promozione-salute-prevenzione/FOGLIA5/
Par lei il calendari des iniziativis che a son sul teritori e vê informazions inzornadis dal Dipartiment di Prevenzion che si ocupe di vacinis, si pues viodi te sezion dedicade che e je sul sît de ASUFC
Dipartiment di Prevenzion - Igjiene e Sanitât Publiche (il link al vierç une gnove barconete)
https://asufc.sanita.fvg.it/it/strutture/dipartimento_prevenzione/SISP/