Servizi Civîl Universâl: viert il Bant par volontaris in Cjargne

Lis areis dulà podê fâ il Servizi civîl in Cjargne a son 5:

• animazion di comunitât
• informazion par zovins
• supuart aes personis cun disabilitâts
• animazion culturâl pai anzians
• agriculture sociâl

In struc, i progjets a son:

Comunità generative (Comuns di Comelians, Paulâr e Soclêf): il progjet al à chê di contribuî ae realizazion dal centri civic di Comelians. Il centri civic al è un imobil che lis personis e lis associazions dal Comun e dai paîs dongje a doprin par cjatâsi, imparâ, fâ ativitâts insiemi, scambiâsi cognossincis. Il centri civic al è un motôr di cressite de comunitât. Il volontari al colabore cui referents de Comunitât e dal Comun intes ativitâts di gjestion dal centri, inte scolte e animazion de citadinance, inte comunicazion.

Il futuro nelle tue mani (Comunitât di Mont de Cjargne e CSV): une part des ativitâts dal progjet e je leade al Centri EUROPE DIRECT de Cjargne. EUROPE DIRECT al è une iniziative de Comission Europeane e la Comunitât di mont e je une dai siei colaboradôrs. Cul Centri si jude a promovi la partecipazion ative ae vite de proprie comunitât, si facilite l’acès ae informazion, l’orientament educatîf e professionâl, il dirit al studi e si sostegnin la cognossince dal mont de imprenditorialitât e la difusion de culture di imprese. Une altre part dal progjet e tocje ativitâts di animazion teritoriâl e di supuart aes Associazions dal teritori.

Margini d’inclusività (Anffas e Comunità di Rinascita): lis ativitâts dal progjet a son leadis ai servizis che la cooperative sociâl Comunità di Rinascita e Anffas Alto Friuli APS-ETS a puartin indenant a Tumieç, la prime dal 1977 e la seconde dal 1985 indenant, a pro de autonomie e di un bon nivel di vite sociâl pes personis cun disabilitâts. Il progjet al à tant che obietîf specific chel di promovi la inclusion sociâl di chestis personis in dôs manieris: di une bande lavorant su lis lôr competencis sociorelazionâls e su la lôr autonomie personâl; di chê altre supuartant lis lôr fameis creant oportunitâts di confront e di sostegn.

Evergreen (Comunitât di Mont de Cjargne/Servizi Sociâl dai Comuns de Cjargne, Acli di Davâr e Acli di Trep Liussûl): cun chest progjet si vuelin ridusi la emargjinazion e la solitudin dai anzians promovint ativitâts ricreativis tra personis che a condividin i stes interès. A saran duncje inmaneâts events sul teme dal invecjâ in maniere ative che, tal complès, a disvilupin la cundizion fisiche, sociâl e psicologjiche dal anzian, incressint il benstâ e la autonomie. Cun di plui, il progjet al garantìs la inclusion e l’acès ae ativitât, cjapant dentri i partecipants in maniere eficiente, costante e concrete, par superâ i ostacui de cundizion di margjinalitât e di isolament, che spes no permet ai anzians di svicinâsi aes ativitâts pensadis par lôr e che ur coventin.

Con-fini sociali (Comunitât di Mont de Cjargne): il progjet al à chê di promovi il disvilup di comunitâts saldis inte aree rurâl cjargnele midiant de agriculture sociâl. Lis ativitâts a tocjaran la formazion, l’orientament e la istruzion leade aes pussibilitâts che la agriculture e ufrìs in Cjargne, massime ai zovins, favorint la difusion e il scambi di cognossincis e dai imprescj de agriculture moderne.