Make Sense Campaign 2023 - "Hai la testa a posto?"
joibe 14 di Setembar dal 2023
Il Dipartiment Cjâf cuel e Neurosiencis de ASUFC al è impegnât in maniere ative inte campagne di prevenzion dai tumôrs dal Cjâf cuel che e à non "Hai la testa a posto ?”
Al è un tumôr che al interesse di plui i oms, cuntune incidence che e je tra lis dôs e lis trê voltis plui alte a pet di chê des feminis, e che al tocje cui che al à plui di 40 agns, cundut che lis diagnosis a son daûr a aumentâ ancje tra lis feminis e lis personis sot di chê etât.
I fatôrs di pericul principâi pal disvilup de malatie (in particolâr pai tumôrs dal ingjâf orâl, de orofaringje, de ipofaringje e de laringje) a son l’alcul e il tabac, che a son la cause di cirche il 75% dai câs; lis personis che a bevin e che a fumin a corin un pericul une vore plui alt. No si à di dismenteâsi nancje dal Papilloma Virus Uman (HPV), che al è il responsabil di cierts tumôrs cervicocefalics.
Lis unitâts operativis che a son impegnadis e che a lavorin in sinergjie strente pe tutele de salût e de prevenzion oncologjiche a son la Cliniche di Chirurgjie Maxilo faciâl, direte dal professôr Massimo Robiony, e la Struture di ORL (Otorinolaringoiatrie) cun a cjâf il professôr Cesare Miani.
La campagne si davuelzarà cun visitis gratuitis intes zornadis dai 18 e dai 21 di Setembar pe Cliniche di Chirurgjie maxilo faciâl: al baste jentrâ li dai ambulatoris dal paveon 15, tal plan tiere, cence impegnative, des 8:30 aes 14:00. Si pues prenotâsi mandant une mail ae direzion clinicachirurgiamaxillofacciale@asufc.sanita.fvg.it.
La Otorinolaringoiatrie e fasarà lis visitis gratuitis ai 18, 20 e 22 di Setembar des 9:00 aes 12:00. Si à di prenotâsi a chest numar: 0432552801.