"Sfide Creative pe igjiene des mans": une iniziative di ASUFC pe Zornade Mondiâl dai 5 di Mai dal 2025
miercus 30 di Avrîl dal 2025
La Aziende Sanitarie Universitarie Friûl Centrâl e partecipe ae “Sfide Creative su la igjiene des mans”, une competizion nazionâl promovude de Societât Taliane di Igjiene, Medisine Preventive e Sanitât Publiche (SItI) – Grup Talian di Studi de Igjiene Ospedaliere (GISIO), iniziative indreçade ai students dal Cors di Lauree in Assistence Sanitarie de Universitât di Triest e di chê dal Friûl, cun sede a Gurize.
Cheste iniziative e je promovude in ocasion de Zornade Mondiâl dai 5 di Mai e e smire a sensibilizâ sedi i operadׅôrs sanitaris che i utents su la impuartance fondamentâl de igjiene des mans intes struturis assistenziâls pe prevenzion des infezions che a àn a ce fâ cu lis ativitâts di assistence.
Cu la adesion ae competizion nazionâl, i students dal III an dal Cors di Lauree in Assistence Sanitarie a àn elaborât lis propuestis progjetuâls che a saran valutadis di une comission locâl su la fonde di criteris standardizâts.
Ai 5 di Mai si proclamaran i vincidôrs intes sedis di ASUFC: cui che al cjaparà il prin premi al parteciparà ae competizion nazionâl che si fasarà tal 58m Congrès Nazionâl de SItI a Bologne tal Otubar di chest an.
Il prodot vincidôr dal prin premi al sarà doprât par trasmeti ai sanitaris e ai visitadôrs tal ambit assistenziâl di ASU FC messaçs sui compuartaments virtuôs. La iniziative e met in evidence informazions une vore impuartantis, par esempli la impuartance di evitâ ornaments personâi, di mantignî lis ongulis a norme, di doprâ lis manecis in maniere corete, visantsi chestis no sostituissin la igjiene des mans.